‘पहिलीपासून तीन भाषा’ विषयावर शिक्षण कट्टा

‘पहिलीपासून तीन भाषा’ विषयावर शिक्षण कट्टा
शनिवारी यशवंतराव चव्हाण सेंटरमध्ये आयोजन
सकाळ वृत्तसेवा
मुंबई, ता. २४ : ‘पहिलीपासून तीन भाषा’ या विषयावर चर्चा करण्यासाठी शिक्षण विकास मंच, यशवंतराव चव्हाण सेंटर यांच्‍या वतीने शिक्षण कट्टा आयोजित करण्यात आला आहे. हा कार्यक्रम शनिवारी (ता. २८) दुपारी ३ ते ५ या वेळेत ऋणानुबंध सभागृह, तळमजला, यशवंतराव चव्हाण सेंटर, मुंबई येथे होणार आहे.
या कट्ट्यामध्ये बालमानस मेंदूतज्ज्ञ डाॅ. श्रुती पानसे बहुभाषिकत्वाचे मानसशास्त्रीय आणि शैक्षणिक आधार, विभागीय शिक्षण मंडळ, वाशीच्या माजी सचिव बसंती रॉय या पायाभूत स्तरावरील बहुभाषिकत्व, राष्ट्रीय शैक्षणिक धोरण-२०२० आणि शासन निर्णय, राज्य अभ्यासक्रम आराखडा समितीचे सदस्य महेंद्र गणपुले तिसरी भाषा पहिलीपासून का आणि कशी आली? या विषयावर उपस्थितांसमोर मांडणी करणार आहेत.
राज्यात पहिलीपासून तिसरी भाषा लागू करण्याचा निर्णय शासनाने जाहीर केला. ही भाषा बंधनकारक करताना शैक्षणिक धोरण-२०२०, राज्य अभ्यासक्रम आराखडा-२०२४चा दाखला देण्यात आला आहे. या निर्णयाबाबत राज्यात सध्या वादंग सुरू आहे. सध्या हा विषय शैक्षणिक पातळीवरून राजकीय पातळीवर गेला आहे, या संदर्भाने या विषयावर सर्वांगीण चर्चा व्हावी यासाठी या शिक्षण कट्ट्याचे आयोजन करण्यात आले असल्याची माहिती शिक्षण विकास मंचचे मुख्य समन्वयक डाॅ. माधव सूर्यवंशी यांनी दिली.

नोंदणी करण्याचे आवाहन
मुंबईत होणाऱ्या शिक्षण कट्टामध्ये शिक्षण, साहित्य आदी क्षेत्रातील व्यक्ती, तज्ज्ञांना सहभागी होता येईल, यासाठी https://forms.gle/Jt5m9rpLEh2386MA9 या लिंकवर नोंदणी करण्याचे आवाहन करण्यात आले आहे.

निःशुल्‍क प्रवेश
या कार्यक्रमात शिक्षक, मुख्याध्यापक, शिक्षणतज्ज्ञ, अभ्यासक, पत्रकार, पालक, विद्यार्थी यांना सहभागी होऊन आपले विचार मांडता येतील. हा कार्यक्रम प्रत्यक्ष होणार असून, तो निःशुल्क आहे.