२५ लाखांच्या बनावट नोटा हस्तगत

२५ लाखांच्या बनावट नोटा हस्तगत
मुंबई, ता. ३० ः कॉटन ग्रीन येथे २५ लाख रुपयांच्या बनावट नोटा विक्रीसाठी घेऊन आलेल्या तरुणास पोलिसांनी अटक केली. एक लाख रुपयांच्या बदल्यात तो पाच लाखांच्या बनावट नोटा विकणार होता.
भारतीय चलनी नोटांमध्ये किचकट सुरक्षा वैशिष्ट्ये अंतर्भूत झाल्यानंतर सीमेपलीकडील बनावट नोटांचे छापखाने ओस पडले. हुबेहूब नोटा छापणे सहज शक्य राहिले नसले तरी गुन्हेगारी पार्श्वभूमी असलेल्या व्यक्तींकडून तसे प्रयत्न मात्र थांबलेले नाहीत. अशात अलीकडेच खार येथील एका एटीएम यंत्रातून चक्क बनावट नोटा निघाल्याची घटना ताजी असताना या प्रकरणातील आरोपीने एक शक्कल लढवली.
आरोपी आणि त्याच्या साथीदारांनी पाचशे रुपयांच्या चलनी नोटांची कलर झेरॉक्स काढून मालवणीतील तरुणास संपर्क साधला. एटीएम यंत्रात सहज डिपॉझिट होतील, अशा बनावट नोटा आपल्याकडे उपलब्ध आहेत. लाख रुपयात पाच लाखांच्या नोटा मिळतील, असे सांगितले. सौदा पटल्याचे सांगत कॉटन ग्रीन येथे भेट ठरली. मालवणीतल्या तरुणाने मात्र याबाबतची आगाऊ माहिती काळाचौकी पोलिसांना दिली. पोलिसांनी आपला सापळा रचून बनावट नोटा घेऊन आलेल्या अंकित नावाच्या तरुणास अटक केली. त्याच्याकडे २५ लाख रुपयांच्या बनावट नोटा सापडल्या. त्याच्या अन्य साथीदारांचा शोध सुरू असल्याचे पोलिस ठाण्यातून सांगण्यात आले.