सावित्रीबाई फुले रुग्णालयात एनआयसीयू

सावित्रीबाई फुले रुग्णालयात एनआयसीयू
सकाळ वृत्तसेवा
मुंबई,ता. १३ : मुंबई महापालिकेकडे व्यवस्थापन असणाऱ्या बोरिवलीच्या क्रांतिज्योती सावित्रीबाई फुले जनरल रुग्णालयात लवकरच नवजात शिशु अतिदक्षता विभाग (एनआयसीयू) सुरू होणार आहे.
हे रुग्णालय तीन वर्षांपूर्वी सुरू करण्यात आले असून, आतापर्यंत या रुग्णालयात आयसीयू किंवा एनआयसीयू सुविधा उपलब्ध नव्हत्या. परिणामी गंभीर स्थितीत असलेल्या गर्भवती महिला किंवा नवजात बालकांना कांदिवलीच्या शताब्दी रुग्णालय किंवा इतर महापालिका रुग्णालयात उपचारासाठी दाखल केले जात असे. त्यामुळे लोकांना खूप त्रास सहन करावा लागत होता. स्थानिक लोकप्रतिनिधी एनआयसीयू आणि आयसीयूच्या सुविधेसाठी महापालिकेशी सतत पत्रव्यवहार करत होते. शिवसेना (उ.बा.ठा)चे आमदार सचिन अहिर यांनीही एनआयसीयू तातडीने सुरू करण्याची मागणी करणारे पत्र लिहिले होते. प्रशासनाने एनआयसीयू उघडण्यासाठी निविदा प्रक्रिया सुरू केली असून, ती अंतिम टप्प्यात आहे. एनआयसीयू सुरू झाल्यानंतर बोरिवलीच्या लोकांना मोठा दिलासा मिळणार आहे.