अकरावीची दुसऱ्या फेरीची गुणवत्ता यादी १७ जुलैला

अकरावीची दुसऱ्या फेरीची
गुणवत्ता यादी १७ जुलैला
मुंबई, ता. १३ : अकरावी ऑनलाइन प्रवेश प्रक्रियेच्या दुसऱ्या फेरीच्या नोंदणीची मुदत आज संपली. या फेरीची गुणवत्ता यादी १७ जुलैला जाहीर होणार आहे. दुसऱ्या प्रवेश फेरीसाठी राज्यभरातून एकूण एक लाख ३८ हजार १०१ विद्यार्थ्यांनी नवीन नोंदणी केली आहे. पाच लाख ५३ हजार ९०३ विद्यार्थ्यांनी प्रवेश अर्जाचा भाग २ मध्ये पसंतीक्रम भरला आहे, अशी माहिती शिक्षण संचालक डॉ. महेश पालकर यांनी दिली.

अकरावी ऑनलाइन प्रवेश प्रक्रियेत पहिल्या आणि दुसऱ्या फेरीसाठी आतापर्यंत सहा लाख ७४ हजार ८८३ मुलींनी आणि सात लाख ३४ हजार २१० मुलांनी असे एकूण १४ लाख ०९ हजार ९३ विद्यार्थ्यांनी नोंदणी केली आहे. अकरावी ऑनलाइन प्रवेशाच्या दुसऱ्या फेरीतील कॅप आणि कोट्यातील प्रवेशाची गुणवत्ता यादी १७ जुलैला जाहीर झाल्यानंतर १८ ते २१ जुलैदरम्यान या फेरीत पसंती क्रमानुसार विविध महाविद्यालयांत प्रवेशासाठी पात्र ठरलेल्या विद्यार्थ्यांचे प्रवेश होतील आणि त्यानंतर २३ जुलैला या फेरीनंतर रिक्त राहिलेल्या जागांची यादी जाहीर केली जाईल. त्यानंतर शिक्षण संचालनालयाकडून अकरावीच्या तिसऱ्या प्रवेश फेरीचे नियोजन जाहीर केले जाणार आहे.