मुंबईत पावसाचा जोर ओसरला

मुंबईत पावसाचा जोर ओसरला
मुंबई, ता. २६ : शहरासह उपनगरांत शनिवारी (ता. २६) पावसाचा जोर कमी झालेला दिसला. दिवसभरात कुलाबा १.२ आणि सांताक्रूझ ३.७ मि.मी. पावसाची नोंद झाली. असे असले तरी गेल्या २४ तासांत दमदार पावसाची नोंद झाली. मलबार हिल, विक्रोळी, माटुंगा, घाटकोपर, वांद्रे, राम मंदिर आणि कांदिवली परिसरात चांगला पाऊस झाला. रविवारी सुट्टीचा मुहूर्त साधत मुंबईकर पावसाचा आनंद घेण्यासाठी मोठ्या संख्येने घराबाहेर पडले.

हवामान विभागाने दिलेल्या माहितीनुसार गेल्या २४ तासांत शहर भागात कुलाबा २१, सॅंडहर्स्ट रोड २०.१, माटुंगा २४.८६, मलबार हिल १९.५२ मि.मी. पाऊस झाला. पूर्व उपनगरांत घाटकोपर ३१.६, कुर्ला २०.५३, गोवंडी २१.७८, मुलुंड २२.३५, भांडुप ३०.६६, विक्रोळी २६ मि.मी. पावसाची नोंद झाली. आज सांताक्रूझ येथे कमाल तापमान २९.५ अंश सेल्सिअस, आर्द्रता ८९ टक्के नोंद झाली. कुलाबा येथे तापमान २९.४ अंश, आर्द्रता ९० टक्के नोंद झाली. यामुळे पावसाळी वातावरण असूनदेखील उकाडा जाणवला. रविवारी (ता. २७) शहर आणि उपनगरांत ढगाळ हवामानासह मुसळधार पावसाची शक्यता आहे. काही ठिकाणी ३० ते ४० किमी प्रतितास वेगाने वारे वाहू शकतात. कमाल तापमान ३० अंश आणि किमान तापमान २५ अंश सेल्सिअस राहण्याची शक्यता हवामान विभागाने वर्तविली आहे.