हेपेटायटिस-सी संसर्गात घट

हिपॅटायटीस सी संसर्गात घट
यकृत तपासणीसाठी लोक अधिक सजग
सकाळ वृत्तसेवा
मुंबई, ता. २८ : शरीरामधील विषारी घटक (टॉक्सिन्स) बाहेर टाकणाऱ्या यकृतावर होणाऱ्या धोकादायक संसर्गांमध्ये एक असलेल्या हिपॅटायटीस सीच्या रुग्णसंख्येत राज्यात गेल्या साडेचार वर्षांत घट झाली आहे. २०२१-२२ या वर्षात १३३९ रुग्ण आढळले होते, तर एप्रिल २०२५ पर्यंत हे प्रमाण केवळ २७९ वर घसरले आहे.

आरोग्य विभागाच्या आकडेवारीनुसार, लोक यकृताच्या आरोग्याबाबत अधिक जागरूक होत असून, वेळच्यावेळी तपासण्या करत आहेत. हिपॅटायटीस बीचा संसर्ग स्थिर आहे. हा संसर्ग पूर्वीपासून असलेल्यांमध्ये अधिक दिसून येत आहे. सरकारी लसीकरण कार्यक्रमात २००१ पासून नवजात बालकांना हिपॅटायटीस बी लस दिली जात आहे. त्यामुळे नव्या पिढीत या संसर्गाचे प्रमाण कमी असल्याचे पालिकेच्या केईएम रुग्णालयाच्या गॅस्ट्रो विभागप्रमुख डॉ. आकाश शुक्ला यांनी सांगितले.

जनजागृती वाढवावी
दरवर्षी २८ जुलै हा जागतिक हिपॅटायटीसदिन म्हणून साजरा केला जातो. हिपॅटायटीसच्या विविध प्रकारांपैकी हिपॅटायटीस सी लिव्हरसाठी अत्यंत घातक मानला जातो. त्यामुळे लोकांनी वेळोवेळी यकृत तपासण्या करून घ्याव्यात, असे आवाहन तज्ज्ञ डॉक्टरांनी केले आहे.