कूपर रुग्णालयात घाणीचे साम्राज्य

कूपर रुग्णालयात घाणीचे साम्राज्य
दुर्गंधीमुळे रुग्‍ण, नातेवाईक हैराण
सकाळ वृत्तसेवा
मुंबई, ता. ९ : महापालिकेच्या कूपर रुग्णालयात सध्या कचऱ्याचे साम्राज्य पसरले असून प्रत्येक ठिकाणी अस्वच्छता दिसून येत आहे. येथील स्वच्छतागृहातून दुर्गंधी पसरत असल्याने रुग्ण व नातेवाइकांकडून नाराजी व्यक्त करण्यात येत आहे.
स्वच्छ भारत अभियान तसेच स्वच्छतेसाठी विविध अभियान सरकारकडून राबवण्यात येत असले तरी महापालिकेतील रुग्णालये मात्र अजूनही स्वच्छतेच्या बाबतीत म्हणावी तशी जागरूक झालेली दिसत नाहीत. कोणी मंत्री किंवा एखाद्या पक्षाचा वरिष्ठ नेता, सेलिब्रिटी रुग्णालयात हजेरी लावणार असल्यावर मात्र घाईघाईने मग अगदी स्वच्छतेचे कंत्राट देऊन साफसफाई करून घेतली जाते, असे सेलिब्रिटी रुग्णालयात उपचार घेत नसूनही केवळ हजेरी लावणार म्हणून होणारी स्वच्छता आणि दुसरीकडे रोज उपचारांसाठी येणाऱ्या सर्वसामान्य रुग्णांना घाणीचा होणारा त्रास अशी स्थिती दिसत असल्याने नागरिकांकडून नाराजी व्यक्त करण्यात येत आहे.
पालिकेच्या मुख्य रुग्णालयांमधील केईएम, सायन रुग्णालयानंतर आता विलेपार्लेमधील कूपर रुग्णालयातही स्वच्छतेचा बोजवारा उडालेला दिसून येत आहे. रुग्णालयातील मुख्य जागा, जिने, खिडक्या, पॅसेजमधील ग्रील येथे तर पाण्याच्या बाटल्या, प्लॅस्टिकच्या पिशव्या यांनी रुग्णालयाची शोभा घालवली आहे. तर पानाच्या पिचकाऱ्यांनी जिन्यालगतच्या भिंतीदेखील रंगलेल्या दिसून येत आहेत. स्वच्छतागृहांमधून येणारी दुर्गंधी आजूबाजूला असणाऱ्या विभागांमध्येदेखील पसरत असल्याने येणारे रुग्ण हैराण झाले आहेत.
एक्स-रे विभागाच्या शेजारी असलेल्या स्वच्छतागृहामुळे एक्स-रे काढण्यासाठी गेलेले रुग्ण व नातेवाईक रांगेत उभे राहण्यासाठीही धजावत नसल्याचे दिसून येत आहे. एक्स-रे काढून आल्यानंतर त्यांच्याशी बोलले असता या दुर्गंधीमुळे काही खाण्याची वा पिण्याची ही इच्छा राहिली नसल्याची प्रतिक्रिया त्‍यांनी दिली.
या दुर्गंधीमुळे स्वच्छतागृहात न जाणारे काही रुग्ण व रुग्णांचे नातेवाईक बाहेर असलेल्या कचऱ्याच्या पेट्यांमध्येच तोंड धूत असल्याचे प्रकारदेखील रुग्णालयात होत आहेत; मात्र याकडे रुग्णालय प्रशासनाचे दुर्लक्ष होत असल्याचे रुग्ण व नातेवाईक सांगतात.
रुग्णालयात स्वच्छता करण्यासाठी कर्मचारी असूनही स्वच्छतेच्या बाबतीत प्रशासनाच्या दुर्लक्षामुळे हे कर्मचारी कोणत्याही प्रकारची कामे करत नसल्याचे बोलले जात आहे. त्यामुळे लवकरात लवकर स्वच्छतेची समस्या सुटावी, अशी मागणी रुग्ण व नातेवाइकांकडून करण्यात येत आहे.

पूर्णवेळ अधिष्‍ठाता नाही
सध्या रुग्णालयात पूर्ण वेळ अधिष्ठाता नाही. माजी अधिष्ठाता असतानाही स्वच्छतेच्या बाबतीत म्हणावी तशी कार्यवाही होत नव्हती. आता लवकरात लवकर रुग्णालयातील अस्वच्छतेचा प्रश्न मार्गी काढणार असल्याचे रुग्णालयातील वरिष्ठ अधिकारी सांगतात.