बेस्ट एम्प्लॉईज को-ऑप. क्रेडिट सोसायटीच्या निवडणुकीत चुरस

‘बेस्ट’ सोसायटीच्या निवडणुकीत चुरस
दोन प्रमुख गट आमनेसामने

सकाळ वृत्तसेवा
मुंबई, ता. १० : ‘दि बेस्ट एम्प्लॉईज को-ऑप. क्रेडिट सोसायटी लि.’च्या २०२५च्या पंचवार्षिक निवडणुकीत यंदा दोन प्रमुख गट आमनेसामने आले आहेत. बेस्ट कामगार सेना व महाराष्ट्र नवनिर्माण सेनेच्या युतीने उभा केलेल्या पॅनेलला ‘सहकार समृद्धी पॅनेल’कडून टक्कर मिळणार आहे. निवडणूक सोमवारी (ता. १८) होणार असून, दोन्ही गटांनी प्रचारावर जोर दिला आहे.
‘सहकार समृद्धी पॅनेल’मध्ये आमदार प्रवीण दरेकर व प्रसाद लाड यांची श्रमिक उत्कर्ष सभा, मंत्री नितेश राणे यांची समर्थ बेस्ट कामगार संघटना, किरण पावसकर यांची राष्ट्रीय कर्मचारी सेना (शिवसेना-शिंदे गट), महेंद्र साळवे यांची बेस्ट एसी/एसटी/व्हीजेएनटी वेल्फेअर असोसिएशन व दिवंगत मनोज संसारे यांचा बहुजन संघ अशा पाच संघटना सहभागी आहेत. या पॅनेलने विद्यमान सत्ताधारी मंडळावर भ्रष्टाचाराचा आरोप करीत एकत्रित लढा देण्याचा निर्धार व्यक्त केला आहे. दरम्यान, सध्या सत्तेत असलेल्या ‘ठाकरे सेना’ गटाने मागील नऊ वर्षांत सोसायटीचा दर्जा ‘अ’ श्रेणीतून ‘ब’ श्रेणीत घसरवला, तसेच सभासदसंख्या कमी झाल्याचे आरोप प्रतिस्पर्धी गटांकडून करण्यात आले आहेत. यापूर्वी बेस्ट उपक्रमावर ३५ वर्षे सत्ताधारी राहिलेल्या या गटाने संस्थेची आर्थिक स्थिती खालावल्याचा आरोपही करण्यात आला आहे.