वाकोला केबल स्टे ब्रिज गुरूवारी खुला होणार

वाकोला केबल स्टे ब्रिज गुरुवारी खुला होणार
पूर्व-पश्चिम उपनगरांतील वाहतूक सुसाट होणार
सकाळ वृत्तसेवा
मुंबई, ता. १२ : पूर्व-पश्चिम उपनगरांतील वाहतूक सुसाट व्हावी, यासाठी एमएमआरडीएने उभारलेले सांताक्रूझ-चेंबूर लिंक रोडचा विस्तारित भाग असलेल्या वाकोला येथील केबल स्टे ब्रिजचे काम पूर्ण झाले. रंगरंगोटीसह वाहतूक चिन्ह झाले असून, गुरुवारी मुख्यमंत्र्यांच्या हस्ते लोकार्पण होणार आहे. त्यानुसार हा पूल सेवेत येणार असल्याने पूर्व-पश्चिम उपनगरांतील कोंडी फुटणार आहे.
नवी मुंबई किंवा पूर्व उपनगरांतून आलेल्या वाहनधारकांना पश्चिम उपनगरांत सहजपणे जाता यावे तसेच पश्चिम उपनगरांतून पूर्व उपनगरांत जाण्यासाठी एमएमआरडीए सांताक्रूझ-चेंबूर लिंक रोड तयार केला आहे. मात्र वाकोल्यापासून पुढे पश्चिम द्रुतगती मार्गावर जाताना मोठ्या प्रमाणात वाहतूक कोंडीचा सामना करावा लागत होता. त्यामुळे एमएमआरडीएने पूर्व उपनगरांतून आलेल्या वाहनधारकांना सहजपणे पश्चिम द्रुतगती मार्गावर जाता यावे, म्हणून १०० मीटर लांबीचा वक्राकार केबल स्टे पूल उभारला आहे. त्याचे लोकार्पण आता होणार असल्याने वाहनधारकांना मोठा दिलासा मिळणार आहे.
सध्या सांताक्रूझ-चेंबूर लिंक रोडने आलेली वाहने पश्चिम द्रुतगती मार्गावर जाण्यासाठी वाकोला येथे मोठी वाहतूक कोंडी होते. त्याचा फटका दक्षिण मुंबईतून येणाऱ्या वाहनांना बसत असून कलानगर, खेरवाडी येथेही वाहतूक कोंडी होते. मात्र आता सांताक्रूझ-चेंबूर लिंक रोडवरून आलेली वाहने नव्या केबल स्टे ब्रिजमुळे थेट पश्चिम द्रुतगती मार्गावर जाणार आहेत. त्यामुळे वाकोला परिसरातील वाहतूक कोंडी संपणार असल्याने कलानगरची वाहतूक कोंडी फुटणार आहे.

-(केबल स्टे ब्रिजचे फोटो विजय बाटे पाठवणार आहेत)