अतिरिक्त शुल्क आकारू नका

अतिरिक्त शुल्क आकारू नका
महाविद्यालयांना स्पष्ट आदेश

मुंबई, ता. १२ : राज्यातील उच्च व तंत्र‍शिक्षण विभागाच्या अंतर्गत येणाऱ्या अनुदानित, विनाअनुदानितच्या व्यावसायिक अभ्यासक्रमांसाठी शुल्क नियामक प्राधिकरणाने (एफआरए) निश्चित केलेल्या शुल्कांव्यतिरिक्त अधिकचे शुल्क घेऊ नये, असे स्पष्ट आदेश उच्च व तंत्रशिक्षण विभागाने दिले आहेत. या आदेशाचे पालन न करणाऱ्या संबंधित संस्था आणि महाविद्यालयांवर कारवाई केली जाणार असल्याचेही आदेशात नमूद करण्यात आले आहे.
राज्यातील विविध पदविका, पदवी, पदव्युत्तरच्या अभ्यासक्रमांसाठी एफआरएने निश्चित केलेल्या शुल्काव्यतिरिक्त अधिकचे शुल्क अनेक संस्थांकडून घेतले जात असल्याने यासाठीची खबरदारी म्हणून विभागाने हे आदेश शासन निर्णयामार्फत जारी केले आहेत. यामध्ये प्रामुख्याने सर्व संस्थांनी प्रत्येक वर्षासाठी निश्चित एफआरएने निश्चित केलेल्या शुल्कांची माहिती विद्यार्थी आणि पालकांना निदर्शनास येईल, अशा पद्धतीने ती सूचनाफलक आणि संकेतस्थळावर लावणे बंधनकारक आहे. एफआरएने निश्चित केलेल्या शुल्कानुसार केवळ एकाच वर्षातील शुल्क संस्थांना आकारण्याची मुभा आहे.
शासनाच्या योजनेच्या लाभासाठी पात्र असलेल्या विविध राखीव घटकांतील विद्यार्थ्यांना दिली जाणारी शिष्यवृत्तीची रक्कम वजा करूनच उर्वरित शुल्कांची रक्कम घ्यावी, तसेच राज्यातील सर्व महाविद्यालयांनी शुल्काच्या योजनेच्या लाभासाठी विद्यार्थ्यांना महाडीबीटी पोर्टलवर अर्ज भरण्यासाठी माहिती द्यावी, असेही आदेशात म्हटले आहे. या विद्यार्थ्यांकडून अतिरिक्त शुल्काची मागणी करण्याची तक्रार आल्यास त्याची तक्रार सीईटी सेल, संचालनालयाकडे करता येईल. यासाठी सीईटी सेलच्या मदत कक्षाची विद्यार्थ्यांना मदत घेता येईल.
...
माहिती देणे आवश्यक
व्यावसायिक अभ्यासक्रमांचे सर्व प्रवेश सीईटी सेलच्या माध्यमातून घेण्यात आलेल्या सीईटीच्या आधारावर केले जातात. यादरम्यान संबंधित महाविद्यालयांना त्या त्या शैक्षणिक वर्षात शुल्क निश्चित करून ते आकारण्याची मुभा एफआरएकडून दिली जाते. हे निश्चित करून देण्यात आलेले शुल्क संबंधित संस्था, महाविद्यालयांनी आपल्या संकेतस्थळावर तसेच माहिती पटलावर देणे आवश्यक असते; मात्र ती दिली जात नाही. विद्यार्थ्यांकडून एफआरएने ठरवून दिलेल्या शुल्काव्यतिरिक्त शुल्क आकारले जाते.