‘शोले’च्या मूळ प्रदर्शनाला ५० वर्षे पूर्ण; विशेष पोस्टकार्डचे अनावरण

‘शोले’च्या मूळ प्रदर्शनाला ५० वर्षे पूर्ण; विशेष पोस्टकार्डचे अनावरण
मुंबई ः १५ ऑगस्ट १९७५ रोजी प्रदर्शित झालेल्या ‘शोले’ या चित्रपटाच्या मूळ प्रदर्शनाला आज ५० वर्षे पूर्ण झाली. जी. पी. सिप्पीद्वारा निर्मित या चित्रपटाने सिनेजगतात आपले एक विशेष स्थान निर्माण केले आहे. पन्नास वर्षांनंतरही ‘शोले’ या चित्रपटाचे प्रेक्षकांच्या मनावर गारुड आहे, असे मत महाराष्ट्र डाक सर्कलचे मुख्य पोस्टमास्टर जनरल अमिताभ सिंह यांनी व्यक्त केले. ‘शोले’ या चित्रपटाच्या मूळ प्रदर्शनाला ५० वर्षे पूर्ण झाल्यानिमित्ताने महाराष्ट्र पोस्टल सर्कलतर्फे शुक्रवारी (ता. १५) एका विशेष पोस्टकार्डचे अनावरण करण्यात आले. अमिताभ सिंह यांनी या स्मरणीय वस्तूंचे अनावरण केले. या वेळी शहजाद सिप्पी, रोहन सिप्पी, किरण जुनेजा सिप्पी आणि शिवेंद्र सिंग डुंगरपूर तसेच मुंबई क्षेत्र डाक सेवा संचालक केया अरोरा, डाक सेवा मुख्यालय संचालक सिमरन कौर आणि महाराष्ट्र सर्कल आणि मुंबई ‘जीपीओ’च्या संचालिका रेखा रिझवीदेखील उपस्थित होत्या.