Mumbai Rain UPdates: मरिनलाईन्सजवळ जिन्याचा भाग कोसळला; तिघे जखमी

मुंबई, ता.१७ : मरिनलाईन्स स्थानकाजवळील प्रभू गल्लीतील एका इमारतीत रविवारी (ता.१७) सायंकाळी जिन्याचा काही भाग कोसळला. या दुर्घटनेत तिघे जखमी झाले असून सर्वांची प्रकृती स्थिर असल्याचे डॉक्टरांनी सांगितले.

मिळालेल्या माहितीनुसार, चिराबाजार येथील इमारत क्रमांक १४/१६ या दोन मजली इमारतीच्या जिन्याचा काही भाग अचानक कोसळला. घटनेची माहिती मिळताच मुंबई अग्निशमन दल, पोलिसांनी घटनास्थळी धाव घेतली. यामध्ये पराग नझिजका (वय ४०), परेश सोसाटे (३०), दमायंती राठोड (७०) अशी जखमींची नावे आहेत. जखमींना जी. टी. रुग्णालयात दाखल करण्यात आले आहे. या घटनेमुळे परिसरात काही काळ भीतीचे वातावरण निर्माण झाले होते. मात्र, तातडीने बचावकार्य सुरू करून परिस्थिती नियंत्रणात आणण्यात आली.