भांडुप स्‍थानकावर दोन तासांत सात गर्डर बसवले

भांडुप स्‍थानकावर दोन तासांत सात गर्डर बसवले
सकाळ वृत्तसेवा
मुंबई, ता. २० : मुसळधार पावसाच्या तडाख्यातही मध्य रेल्वे आणि मुंबई रेल्वे विकास कॉर्पोरेशनच्या टीमने विक्रमी कामगिरी बजावली आहे. भांडुप रेल्‍वेस्थानकावर नव्या पादचारी पुलासाठी अवघ्या दोन तास १० मिनिटांत तब्बल सात गर्डर यशस्वीरीत्या बसवले आहेत.
शनिवार (ता. १६) ते रविवारी (ता. १७) मध्यरात्री १.१५ ते ३.१५ या वेळेत हे काम करण्यात आले. मेल, एक्स्प्रेस आणि उपनगरी रेल्वेसेवांवर दिवसा परिणाम होऊ नये, यासाठी मध्यरात्री अप-डाऊन जलद मार्गांसह पाचवा व सहावा मार्ग या ठिकाणी ब्लॉक घेण्यात आला होता. या कामात सुमारे १०० रेल्वे कर्मचारी, कंत्राटी कामगार, तज्ज्ञ पर्यवेक्षक आणि अधिकारी सहभागी झाले. गर्डर बसवणे हे तांत्रिकदृष्ट्या अत्यंत कठीण काम मानले जाते. त्यातही मुसळधार पावसामुळे परिस्थिती आणखीनच आव्हानात्मक झाली होती; मात्र अचूक नियोजन, समन्वय आणि समर्पणाच्या जोरावर हे काम वेळेत पूर्ण करण्यात आले.