म्हाडाच्या कोकण मंडळाच्या ७१ व्यवसायिक गळ्यांचा ई-लिलावा होणार

कोकण म्हाडाच्या ७१ व्यावसायिक गाळ्यांचा ई-लिलाव

मुंबई, ता. ११ : म्हाडाच्या कोकण गृहनिर्माण व क्षेत्रविकास मंडळातर्फे विरार बोळिंज (जिल्हा पालघर) व चितळसर मानपाडा (जिल्हा ठाणे) येथील गृहनिर्माण प्रकल्प परिसरातील ७१ अनिवासी गाळ्यांची ई-लिलावाद्वारे विक्री केली जाणार आहे. त्यासाठी ऑनलाइन नोंदणी व अर्ज प्रक्रियेला गो लाइव्ह कार्यक्रमांतर्गत ‘म्हाडा’चे उपमुख्य कार्यकारी अधिकारी अनिल वानखडे यांच्या हस्ते आज (ता. ११) प्रारंभ करण्यात आला.
म्हाडाच्या व्यावसायिक गाळ्यांच्या लिलावात विरार बोळिंज येथील ४४ अनिवासी गाळे व चितळसर मानपाडा येथील २७ अनिवासी गाळे विक्रीसाठी उपलब्ध आहेत. १३ ऑक्टोबरला संगणकीय प्रणालीमध्ये पात्र ठरलेल्या अर्जदारांसाठी ऑनलाइन बोली स्वरूपातील ई-लिलाव www.eauction.mhada.gov.in या संकेतस्थळावर होणार आहे. १४ ऑक्टोबरला सकाळी ११ वाजता https://eauction.mhada.gov.in व https://mhada.gov.in या दोन्ही संकेतस्थळांवर ई-लिलावाचा एकत्रित निकाल जाहीर करण्यात येणार आहे, अशी माहिती कोकण मंडळाच्या मुख्य अधिकारी रेवती गायकर यांनी दिली.

नोंदणीसाठी २६ सप्टेंबरपर्यंत मुदत
या ई-लिलाव प्रक्रियेत भाग घेण्यासाठी https://eauction.mhada.gov.in संकेतस्थळावर नोंदणी करणे, ऑनलाइन अर्ज करणे, कागदपत्रे अपलोड करण्यासाठी आजपासून सुरुवात झाली आहे. त्यासाठी २६ सप्टेंबरपर्यंत रात्री ११.५९ वाजेपर्यंत मुदत दिली आहे.