मुंबई विद्यापीठात “विमुक्त जाती-भटक्या जमाती संशोधन केंद्र” स्थापन होणार

विद्यापीठात आता विमुक्त जाती-भटक्या जमाती संशोधन केंद्र
मुंबई, ता. ११ : मुंबई विद्यापीठात राज्यातील विमुक्त जाती-भटक्या जमातीच्या सामाजिक, सांस्कृतिक, आर्थिक व राजकीय जीवनावर सखोल अभ्यास आणि संशोधन करण्यासाठी स्वतंत्र ‘विमुक्त जाती-भटक्या जमाती संशोधन केंद्र’ स्थापन केले जाणार आहे. राज्यातील पश्चिम महाराष्ट्र, कोकण, मराठवाडा, उत्तर महाराष्ट्र आणि विदर्भ या सर्व प्रांतांमध्ये या समाजघटकांचा विस्तृत अभ्यास व संशोधन या केंद्राच्या माध्यमातून केला जाणार आहे. या केंद्रांच्या माध्यमातून दीर्घकालीन शैक्षणिक व संशोधनाचा पाया मजबूत करणे तथा या केंद्राची ध्येय व उद्दिष्टे यावर चर्चा करण्यासाठी आज (ता. ११) रोजी मुंबई विद्यापीठात ‘३१ ऑगस्ट- भटके विमुक्त दिन’ निमित्ताने परिसंवादाचे आयोजन करण्यात आले होते. कुलगुरू प्रा. रवींद्र कुलकर्णी यांच्या अध्यक्षतेखाली आयोजित या कार्यक्रमासाठी प्रमुख वक्ते म्हणून भटके विमुक्त विकास परिषदेचे अध्यक्ष उद्धव काळे आणि साहित्यिक व भटक्या-विमुक्तांचे कार्यकर्ते लक्ष्मण गायकवाड, प्र-कुलगुरू प्राचार्य डॉ. अजय भामरे डॉ. नारायण भोसले आदी उपस्थित होते.