पत्राचाळ संस्थेच्या सभासदांना आज मिळणार वितरण पत्र

पत्राचाळ संस्थेच्या सभासदांना आज मिळणार वितरणपत्र

मुंबई, ता. ११ : उच्च न्यायालयाच्या निर्देशानुसार गोरेगाव सिद्धार्थनगर (पत्राचाळ) सहकारी गृहनिर्माण संस्थेच्या पात्र सभासदांना म्हाडा मुंबई मंडळातर्फे शुक्रवारी (ता. १२) घराचा ताबा देण्यासंदर्भात वितरणपत्र देण्यात येणार आहे. तर १५ ते ३० सप्टेंबर २०२५ या कालावधीत विंगनिहाय सदनिकाधारक यांच्यासमवेत सदनिकांची तपासणी करून घराचे ताबापत्र दिले जाणार आहे. सर्व पात्र सभासदांनी या वेळेत त्यांचे फोटो ओळखपत्रासह या वेळेत उपस्थित राहावे, असे आवाहन मुंबई मंडळातर्फे करण्यात आले आहे. म्हाडाच्या गोरेगाव सिद्धार्थनगर पुनर्विकास आर-९ भूखंडावरील गोरेगाव सिद्धार्थनगर सहकारी गृहनिर्माण संस्थेच्या पुनर्वसन सदनिकांचे बांधकाम पूर्ण झाले असून इमारतींना २ एप्रिल २०२५ रोजी पूर्ण भोगवटा प्रमाणपत्र प्राप्त झाले आहे. तसेच भूखंड क्र. आर-९ येथील पुनर्विकसित इमारतीमधील सदनिकांची तपासणी संस्थेचे दोन प्रतिनिधी, म्हाडाने प्राधिकृत केलेले अधिकारी, कंत्राटदार मे. रेलकॉन यांचे प्रतिनिधी व सदनिकाधारक (सभासद) यांच्यासमवेत एका दिवशी एका विंगची तपासणी करून व सदनिकांचा ताबा देणार आहेत.