कोळीवाड्यांचे दोन महिन्यांत डीपीमध्ये मार्किंग करा!

कोळीवाड्यांचे दोन महिन्यांत डीपीमध्ये मार्किंग करा!
आशीष शेलार यांचे प्रशासनाला निर्देश

सकाळ वृत्तसेवा
मुंबई, ता. १२ : मुंबई उपनगरातील ज्या कोळीवाड्यांचे सीमांकन झाले आहे त्याचे दोन महिन्यांत शहर विकास आराखड्यात मार्किंग करा, असे निर्देश मुंबई उपनगर पालकमंत्री ॲड. आशीष शेलार यांनी प्रशासनाला दिले. कोळीवाडे आणि गावठाणांच्या सीमांकनाबाबत गुरुवारी (ता. ११) मंत्रालयात बैठक झाली होती. त्याची घोषणा आज शेलार यांनी केली.
उपनगरात २९ कोळीवाडे असून त्यापैकी २३ कोळीवाड्यांचे सीमांकन झाले आहे. यापैकी पाच कोळीवाड्यांतील रहिवाशांनी सीमांमध्ये वाढ झाल्याची तक्रार केल्याने त्यांचे पुन्हा सीमांकन करण्यात आले, तर सहा कोळीवाड्यांमध्ये काही भागांत आदिवासी वस्ती आहे, त्यामुळे त्यांचे सीमांकन अद्याप बाकी आहे. त्याचबरोबर या सीमांकन प्रक्रियेत तीन कोळीवाडे नव्याने सापडले, असेही मुंबई उपनगरच्या जिल्हाधिकाऱ्यांनी सांगितले. दरम्यान, सीमांकन होऊन ही डीपीमध्ये मार्किंग न केल्यामुळे कोळीबांधवांना घरदुरुस्तीसुद्धा करताना अडचणी येत असल्याची बाब आमदार मनीषा चौधरी यांनी निदर्शनास आणली. त्याची दखल घेत आशीष शेलार यांनी कोळीवाड्यांचे ६० दिवसांच्या आत डीपीमध्ये मार्किंग करा, असे निर्देश दिले.