बाइक टॅक्सीचे भाडे निश्चित

बाइक टॅक्सीचे भाडे निश्चित

पहिला टप्पा १५ रुपये, पुढे १०.२७ रुपये प्रति किमी

सकाळ वृत्तसेवा
मुंबई, ता. १५ : मुंबईसह राज्यभरात सुरू होणाऱ्या बाइक टॅक्सी सेवेसाठी सरकारने अधिकृत भाडे जाहीर केले आहे. ‘महाराष्ट्र बाइक-टॅक्सी नियम, २०२५’अंतर्गत इलेक्ट्रिक दुचाकी टॅक्सीचे भाडे निश्चित करण्यात आले आहे. पहिल्या १.५ किलोमीटरसाठी प्रवाशांना १५ रुपये आणि त्यानंतर प्रत्येक किलोमीटरसाठी १०.२७ रुपये आकारले जाणार आहेत.

राज्य परिवहन प्राधिकरणाच्या १८ ऑगस्टच्या बैठकीत भाडे एकसमान ठेवण्यास मान्यता देण्यात आली हाेती. त्यानुसार आता बाइक टॅक्सी सेवा सुरू करण्यासाठी मुंबई महानगर क्षेत्रात तीन कंपन्यांना प्राथमिक परवाना देण्यात आला आहे. यात उबेर इंडिया सिस्टीम प्रा. लि., रोपेन ट्रान्सपोर्टेशन सर्व्हिसेस प्रा. लि. आणि ॲनी टेक्नॉलॉजीज प्रा. लि. यांचा समावेश आहे. या कंपन्यांना ३० दिवसांसाठी तात्पुरता परवाना देण्यात आला आहे. या कालावधीत अटींची पूर्तता केल्यास कायमस्वरूपी परवाना दिला जाणार आहे.

प्रवाशांना दिलासा
बाइक टॅक्सी सेवा सुरू झाल्याने प्रवाशांना वाहतूक कोंडीमध्येही सोपी व स्वस्त प्रवासाची सुविधा मिळणार आहे. छाेट्या अंतरासाठी ही सेवा फायदेशीर ठरणार आहे. आता राज्यातील सर्व बाइक टॅक्सी ॲग्रीगेटर कंपन्यांना सरकारने निश्चित केलेल्या या दराप्रमाणेच शुल्क आकारणे बंधनकारक असेल, असे स्पष्ट करण्यात आले आहे.