१७ सप्टेंबरपासून आरोग्य मोहिमेची राज्यव्यापी सुरुवात

आरोग्य मोहिमेचे राज्यव्यापी उद्‍घाटन
पंतप्रधानांच्या हस्ते इंदूरमधून सुरुवात

सकाळ वृत्तसेवा
मुंबई, ता. १६ : इंदूरमधे नव्याने सुरू होणाऱ्या महत्त्वाकांक्षी आरोग्य योजनेत महाराष्ट्रातील आदिवासी जिल्ह्यांना विशेष प्राधान्य देण्यात आले आहे. यात प्रामुख्याने नंदुरबार, गडचिरोली आणि अमरावती या जिल्ह्यांसह नागपूर, अकोला आणि नाशिक या शहरांना या योजनेचा लाभ प्रथमतः मिळणार असून, येथील आरोग्य यंत्रणेशी व्हिडिओ कॉन्फरन्सिंगद्वारे थेट संवाद साधला जाणार आहे. केंद्र सरकारच्या महत्त्वाकांक्षी योजनेचे उद्‍घाटन पंतप्रधान मोदींच्या हस्ते १७ सप्टेंबर रोजी इंदूरमधून केले जाणार आहे. यानिमित्ताने या मोहिमेचा पंतप्रधानांचा महाराष्ट्रातील कार्यक्रम प्रत्यक्ष न होता ऑनलाइनच होईल, अशी माहिती आरोग्य विभागातील सूत्रांनी दिली.
या मोहिमेचा मुख्य भर महिला आणि लहान बालकापासून ते १८ वर्षे वयोगटातील मुलांवर असणार असून, राज्यातील जवळपास १५ हजार आरोग्य संस्थांमध्ये हे कॅम्पेन राबवले जाईल. ‘लक्षित लोकसंख्येपैकी तब्बल ६० ते ७० टक्के नागरिकांपर्यंत आपण पोहोचू शकू, अशी अपेक्षा आहे. राज्यातील सुमारे १३ कोटी ५० लाख लोकसंख्येपैकी मोठा हिस्सा या मोहिमेत सामावला जाईल. आदिवासी भागातील जनतेमध्ये विशेष जागरूकता निर्माण करण्यावर भर असेल,’ असे आरोग्य विभागाच्या अधिकाऱ्यांनी स्पष्ट केले.
मोहिमेचे समन्वयन करण्यासाठी पुण्यातील अतिरिक्त संचालक डॉ. सांगळे, नागपूर व अकोला येथील अधिकारी तसेच संयुक्त संचालक (हॉस्पिटल व पीएससी) यांचा समावेश असलेला कोरम निश्चित करण्यात आला आहे. राज्यभरातील महापालिका आणि वैद्यकीय शिक्षण विभागही या उपक्रमात सहभागी होणार असून, ग्रामीण भागातील प्राथमिक आरोग्य केंद्रे ते जिल्हा रुग्णालयापर्यंत एकाच वेळी जनजागृती कार्यक्रम सुरू केले जातील.
..............
व्हिडिओ कॉन्फरन्सिंगवर भर
राज्यातील कॅम्पेनची अधिकृत सुरुवात प्रत्यक्ष न करता पंतप्रधानांच्या उपस्थितीत व्हिडिओ कॉन्फरन्सिंगद्वारे होईल. जिल्हा स्तरावर मोठ्या प्रमाणात कार्यक्रमाचे आयोजन करण्यात येणार असल्याने पंतप्रधानांना प्रत्यक्ष बोलावण्यापेक्षा डिजिटल माध्यमाचा उपयोग करणे सोयीचे ठरेल, असे प्रशासनाचे मत आहे.