गणेश कंझ्युमर प्रॉडक्ट आयपीओ ३०६ ते ३२२ रुपये किंमतपट्टा

गणेश कंझ्युमर प्रॉडक्ट आयपीओ ३०६ ते ३२२ रुपये किंमतपट्टा

मुंबई, ता. १७ : स्वयंपाकाला लागणारे घरगुती अन्नसाहित्य तयार करून गणेश ब्रँडच्या नावाखाली विकणारी कोलकाता येथे मुख्यालय असलेली कंपनी गणेश कंझ्युमर प्रॉडक्टच्या आयपीओसाठी ३०६ ते ३२२ रुपये किंमतपट्टा निश्चित करण्यात आला आहे. या आयपीओमध्ये २२ ते २४ सप्टेंबरदरम्यान गुंतवणूक करता येईल.

यात किमान ४६ शेअर्ससाठी व त्यापुढे ४६ च्या पटीतच शेअरसाठी गुंतवणूक करावी लागेल. या रकमेपैकी ६० कोटी रुपये वापरून कंपनी आपले कर्ज पूर्णतः किंवा अंशतः फेडेल, तर ४५ कोटी रुपये खर्चून कंपनीतर्फे आपल्या उत्पादन प्रक्रियेचा विस्तार केला जाईल, त्या रकमेतून दार्जिलिंग येथे पिठाचा उत्पादन प्रकल्प सुरू करण्यात येईल. ही कंपनी पूर्व भारतातील कणिक विक्रीतील तिसरी सर्वात मोठी ब्रॅण्डेड पॅकेज कंपनी आहे, तर गव्हाच्या उपउत्पादनांच्या विक्रीतील (मैदा, सुजी, दलिया) ती पूर्व भारतातील सर्वात मोठी कंपनी आहे. सातू आणि बेसन यांच्या विक्रीतील ही पहिल्या दोन क्रमांकातील मोठी कंपनी आहे. यात तिचा बाजारवाटा ४३.४ टक्के आहे. या आर्थिक वर्षात पश्चिम बंगालमधील कणिक आणि गव्हाच्या उपउत्पादनांच्या विक्रीतील कंपनीचा ४० टक्के वाटा आहे. कंपनीच्या एकूण विक्रीपैकी ९० टक्के विक्री पश्चिम बंगालमध्ये होते. यावर्षीचा त्यांचा महसूल ८५० कोटी रुपये, तर निव्वळ नफा ३५ कोटी रुपये आहे. कंपनीतर्फे गहू, बेसन, मैदा आदी पिठांसोबतच खमण ढोकळा, बेला कचोरी यांची इन्स्टंट फूड मिक्स तसेच मसाला, हळद, धने पूड, भुजिया, चनाचूर आदी नाश्त्याचे पाकीटबंद पदार्थही विकले जातात.