सागरी किनारा मार्गावर बाेगद्यात कारचा भडका

सागरीकिनारा मार्गावर
बाेगद्यात कारचा भडका

वाहतूक दीड तासांनंतर सुरळीत

सकाळ वृत्तसेवा
मुंबई, ता. २५ ः सागरीकिनारा मार्गावर दक्षिणेकडील बोगद्यात गुरुवारी सकाळी साडेनऊ वाजण्याच्या सुमारास कारने अचानक पेट घेतला. या आगीमुळे बाेगद्यात सर्वत्र धूर पसरल्यामुळे खबरदारी म्हणून या मार्गावरील दक्षिण व उत्तर दिशेकडील वाहतूक थांबवण्यात आली होती. जवळपास दीड तासांनंतर वाहतूक सुरळीत झाल्याचे वाहतूक पोलिसांनी सांगितले. दरम्यान, कारचालक बचावला आहे.

आगीच्या घटनेनंतर बोगद्यातील वाहतूक थांबवल्यानंतर हाजी अली आणि वरळी जाेडमार्गावर वाहतूक वळवण्यात आली होती. त्यामुळे या परिसरात मोठी वाहतूक कोंडी झाली होती. आगीमुळे सागरी मार्गावरील (ताडदेव) दक्षिण व उत्तर दिशेकडील वाहतूक थांबवण्यात आली, असे सहपोलिस आयुक्त (वाहतूक) अनिल कुंभारे यांनी सांगितले. तासाभरानंतर येथील वाहतूक सुरळीत करण्यात आली. अग्निशमन दलाच्या पथकाने आग शमवल्यानंतर संबंधित वाहन हटवण्यात आले. त्यानंतर सागरीकिनारा मार्गावरील वाहतूक सुरळीत झाल्याचे ते म्हणाले.
-----
‘दाेन अग्निशमन केंद्रे उभारणार’
कोस्टल रोडवरील सुरक्षा व्यवस्थेत अशा दुर्घटना टाळण्यासाठी दोन स्वतंत्र अग्निशमन केंद्र उभारण्याची योजना आहे. त्यापैकी एक पूनम चेंबरच्या मागे उभारण्यात येणार आहे. संबंधित टेंडर प्रक्रिया पूर्ण झाली असली तरी अद्याप काम सुरू झालेले नाही. बाेगद्यात लागलेल्या आगीची ही पहिली घटना असल्याचे अग्निशमन दलाच्या अधिकाऱ्यांनी सांगितले.