कपिल शर्माला धमकावणारा अटकेत

कपिल शर्माला धमकावणारा अटकेत

मुंबई, ता. २७ ः हास्यकलाकार कपिल शर्मा याला कुख्यात लॉरेन्स बिश्नोईचे नाव घेऊन एक कोटीच्या खंडणीसाठी धमकावणाऱ्या तरुणास मुंबई गुन्हे शाखेने शुक्रवारी (ता. २६) पश्चिम बंगालमधून अटक केली. दिलीप चौधरी असे त्याचे नाव आहे. प्राथमिक चौकशीत आरोपीचा बिश्नाेई किंवा त्याच्या संघटित टोळीशी काही संबंध नसल्याची माहिती पुढे आल्याचे एका वरिष्ठ अधिकाऱ्याने सांगितले.

आरोपी चौधरी २४ परगण्यातील रहिवासी असून तेथील एका कारखान्यात काम करतो. २२ व २३ सप्टेंबरला आरोपीने शर्माच्या स्वीय सहाय्यकास अनेकदा संपर्क साधून खंडणीसाठी धमकावले. खंडणी न दिल्यास ठार मारण्याची धमकी दिली. सहाय्यकाने याबाबत मुंबई पोलिसांकडे तक्रार दिली. त्याआधारे तांत्रिक तपास करून आरोपी चौधरी याला बेड्या ठोकल्या. न्यायालयाने त्याला मंगळवार (ता. ३०)पर्यंत पोलिस कोठडी सुनावली आहे.