‘पीईएसओ’चे सह मुख्य नियंत्रक अटकेत

‘पीईएसओ’चे सह मुख्य नियंत्रक अटकेत

सीबीआयची कारवाई; साथीदारालाही बेड्या, २६ लाखांची रक्कम जप्त

मुंबई, ता. २७ ः पेट्रोलियम अँड एक्सप्लाेझिव्ह सेफ्टी ऑर्गनायझेशनचे (पीईएसओ) सह मुख्य नियंत्रक राजेंद्र रावत आणि त्यांच्या साथीदारास केंद्रीय अन्वेषण विभागाने (सीबीआय) लाचखोरीच्या आरोपात अटक केली. शनिवारी या दोघांना ठाणे येथील विशेष न्यायालयात हजर करण्यात आले. न्यायालयाने त्यांना १ ऑक्टोबरपर्यंत सीबीआय कोठडी सुनावली.

रावत यांच्या गैरव्‍यवहाराबाबत अनेक तक्रारी मिळाल्या होत्या. त्याआधारे रचलेल्या सापळ्यात त्यांचा साथीदार राहुल बचाटे (खासगी व्यक्ती) यास ताब्यात घेण्यात आले. तो नऊ लाख रुपयांची रोकड घेऊन रावत यांच्या निवासस्थानी निघाला होता. ही रक्कम रावत यांच्या आदेशाने त्यांच्या पत्नीकडे दिली जाणार होती. सीबीआय अधिकाऱ्यांनी या रकमेसह रावत यांचे निवासस्थान, कार्यालय आणि सरकारी वाहनातून २६ लाखांची बेहिशेबी रक्कम हस्तगत केली. या कारवाईनंतर अनेक प्रकरणांत रावत यांनी लाच घेतल्याचे साक्षीदार पुढे आल्याचा दावा सीबीआयने केला.