कांदिवली आगीतील मृतांची संख्या सहावर

कांदिवली आगीतील मृतांची संख्या सहावर
सकाळ वृत्तसेवा
मुंबई, ता. ३० ः कांदिवली- आकुर्ली परिसरातील भीषण आगीच्या दुर्घटनेतील मृतांचा आकडा सहावर पोहोचला आहे. ऐरोली बर्न सेंटरमध्ये उपचार सुरू असताना जानकी गुप्ता (वय ३९) आणि दुर्गा गुप्ता (वय ३०) या दोघींचा मृत्यू झाला. जानकी गुप्ता ७० टक्के तर दुर्गा गुप्ता ९० टक्के भाजल्या होत्या.

कांदिवली आगीच्या दुर्घटनेत यापूर्वी रक्षा जोशी (४७), नीतू गुप्ता (३१), पूनम (२८) आणि शिवानी गांधी (५१) या चौघींचा मृत्यू झाला आहे. त्यामुळे मृतांची संख्या आता सहा झाली आहे. दरम्यान, मनाराम कुमाकत (५५) हे ४० टक्के भाजले असून त्यांच्यावर ऐरोली बर्न सेंटरमध्ये उपचार सुरू आहेत. डॉक्टरांनी त्यांची प्रकृती सध्या स्थिर असल्याचे सांगितले आहे. आकुर्ली येथील मेंटेनन्स चौकीशेजारील घरात बुधवारी सकाळी शॉर्टसर्किटमुळे लागलेल्या आगीत गॅस सिलिंडरचा स्फोट झाला. यामध्ये सात जण गंभीर जखमी झाले होते. परिसरात या दुर्दैवी घटनेमुळे हळहळ व्यक्त होत असून या आग प्रकरणाची चौकशी सुरू आहे.