लस निर्मितीसाठी ‘हाफकिन’ला २५ कोटी

लस निर्मितीसाठी ‘हाफकिन’ला २५ कोटी
डॉ. रघुनाथ माशेलकर समितीचा अहवाल सादर

सकाळ वृत्तसेवा
मुंबई, ता. ३० : लस निर्मितीच्या क्षेत्रात हाफकिन संस्थेचे मोलाचे योगदान असून, देशातून पोलिओचे उच्चाटन करण्यामध्ये हाफकिनचा मोठा वाटा आहे. भारत सरकारकडून पोलिओच्या २६८ दशलक्ष मौखिक लसीची मागणी आहे. या लसीची निर्मिती करण्यासाठी हाफकिन जीव औषधनिर्माण महामंडळाला हाफकिन खरेदी कक्षाच्या दोन टक्के उपकरातून २५ कोटी रुपयांचा निधी देण्यास उपमुख्यमंत्री अजित पवार यांच्या अध्यक्षतेखाली झालेल्या बैठकीत तत्त्वतः मान्यता देण्यात आली.

उपमुख्यमंत्री अजित पवार यांच्या अध्यक्षतेखाली मंत्रालयातील समिती कक्षात हाफकिन जीव औषधनिर्माण महामंडळाच्या प्रश्नांसंदर्भात आणि संस्थेतील निवृत्त कर्मचारी आणि अधिकाऱ्यांच्या निवृत्तिवेतनाबाबत बैठकीचे मंगळवारी (ता. ३०) आयोजन करण्यात आले होते. हाफकिन इन्स्टिट्यूट आणि हाफकिन जीव औषधनिर्माण महामंडळाचे सक्षमीकरण करण्यासाठी डॉ. रघुनाथ माशेलकर यांच्या अध्यक्षतेखाली समिती नेमण्यात आली होती. या समितीचा अहवाल शासनास सादर करण्यात आला आहे. या समितीच्या शिफारशींची प्रभावीपणे अंमलबजावणी करण्यासाठी एक समिती स्थापन करण्यात यावी, त्यामध्ये वैद्यकीय शिक्षण, सार्वजनिक आरोग्य आणि नियोजन विभागाच्या सचिवांचा समावेश करावा, या समितीने हाफकिनच्या सक्षमीकरणासाठी पाच वर्षांचा आराखडा तयार करावा, असे निर्देशही उपमुख्यमंत्री अजित पवार यांनी दिले. सध्या हाफकिनकडे सर्पदंशावरील दीड लाख लसी तयार आहेत. सर्पदंशावरील हाफकिनने तयार केलेली लस प्रभावी आणि परिणामकारक आहे. या लसीची खरेदी महाराष्ट्र वैद्यकीय वस्तू खरेदी प्राधिकरणाने हाफकिनमार्फत करावी, असे निर्देशही अजित पवार यांनी या वेळी दिले.