पोलिस वाहनाची नक्कल अंगलट; पाच जणांवर गुन्हा

पोलिस वाहनाची नक्कल अंगलट; पाच जणांवर गुन्हा
मुंबई, ता. ३० : व्यावसायिक उद्देशासाठी पोलिस वाहनाची नक्कल करणाऱ्या महिलेसह पाच जणांविरोधात बांगूरनगर पोलिसांनी गुन्हा नोंदवला. आरोपींनी चित्रीकरणासाठी तयार केलेली हुबेहूब पोलिस जीप रविवारी (ता. २८) रात्री कर्तव्य आटोपून घरी निघालेल्या उपनिरीक्षक देवेंद्र थोरात यांनी मालाड परिसरात पाहिली आणि हा प्रकार उघड झाला. या जीपला पोलिस वाहनाप्रमाणे रंगवून त्यावर पोलिस दलाचे बोधचिन्ह, ब्रीदवाक्य आदी लिहिण्यात आले होते. या वाहनासमोर पोलिस गणवेशात एक तरुण उभा होता, तर समोरून येणाऱ्या एका कारमधून जीपचे चित्रीकरण सुरू होते. हा प्रकार थोडा विचित्र वाटल्याने थोरात यांनी चौकशी केली, तेव्हा ही मंडळी कंटेंट क्रिएटर, अभिनेते आणि खासगी कर्मचारी असल्याची माहिती मिळाली. परवानगी न घेता पोलिस वाहनाची नक्कल आणि चित्रीकरण करणाऱ्या व्यक्तींना थोरात यांनी पोलिस ठाण्यात आणले. पोलिसांनी त्यांच्याविरोधात गुन्हा नोंदवला. रोज ऑडिओ व्हिज्युअल्स या कंपनीसाठी कंटेंट निर्मिती करणाऱ्या अंजली छाबडा, रितेश कौल, ऋषिकेश सक्सेना, मुद्दासीर शेख अशी आरोपींची नावे आहेत.