‘सेवा पंधरवडा’तील रक्तदान शिबिरांमधून अल्प प्रतिसाद

‘सेवा पंधरवड्या’तील रक्तदान शिबिरांमधून अल्प प्रतिसाद
सकाळ वृत्तसेवा
मुंबई, ता. १२ ः राज्य रक्त संक्रमण परिषदेच्या निर्देशानुसार १७ सप्टेंबर ते २ ऑक्टोबर या काळात ‘सेवा पंधरवडा’ उपक्रमांतर्गत राज्यभरात रक्तदान शिबिरे आयोजित करण्यात आली. या उपक्रमाचा उद्देश अधिकाधिक नागरिकांना रक्तदानासाठी प्रोत्साहित करणे हा होता; मात्र सर्व शिबिरे पूर्ण झाल्यानंतर तयार झालेल्या अहवालात काही ठिकाणी अत्यल्प तर काही ठिकाणी ‘शून्य’ रक्तदाता नोंदवले गेल्याचे दिसून आले आहे. परिषदेच्या अधिकाऱ्यांनी हे तांत्रिक बिघाडामुळे झाल्याचे सांगितले; मात्र यावर प्रश्नचिन्ह उपस्थित केले जात आहेत.
नाव न सांगण्याच्या अटीवर परिषदेतील एका अधिकाऱ्याने सांगितले, की काही ठिकाणी ऑनलाइन डेटा अपलोड करताना अडचणी आल्या. प्रत्यक्ष संकलन आणि ऑनलाइन नोंदीत फरक असण्याची शक्यता असल्याचे वर्तविण्यात आले. २९ सप्टेंबरच्या यादीतूनही काही रक्तपेढ्यांनी आयोजित केलेल्या शिबिरांमधील रक्तसंकलन अत्यंत कमी असल्याचे दिसून आले आहे. मुंबईतील काही शिबिरांत तर शून्य ते दोन दात्यांपुरतेच संकलन झाले असल्याची नोंद आहे. तत्पूर्वीच्या अहवालात चक्क शून्य नोंद असल्याचे दिसून येते. रक्तदान शिबिराचा उद्देश चांगला असला तरीही राज्य रक्त संक्रमण परिषदेच्या या उपक्रमावर प्रश्नचिन्ह उपस्थित केले जात आहे.