मुंबईत दोन दिवस पावसाचे!

मुंबईत दोन दिवस पावसाचे!
मुंबई, ता. २५ ः ऑक्टोबर हीटपाठोपाठ मुंबईसह राज्यात पावसाळी वातावरण निर्माण झाले आहे. पुढील ४८ तासांत मुंबई शहर आणि उपनगरात तुरळक ठिकाणी विजांचा कडकडाट आणि सोसाट्याच्या वाऱ्यासह हलका ते मध्यम पाऊस होण्याची शक्यता हवामान विभागाने वर्तविली आहे. मुंबईसह परिसरात काही ठिकाणी ३० ते ५० किमी प्रतितास वेगाने वारे वाहतील. सायंकाळच्या वेळी आकाश ढगाळ राहील, अधूनमधून विजांच्या कडकडाटासह जोरदार सरी बरसण्याची शक्यता आहे. त्यामुळे मुंबईतील तापमानात किंचित घट होण्याची शक्यता आहे.