एसटीच्या सुरक्षा व दक्षता विभागाला मिळणार आयपीएस अधिकारी

एसटीच्या सुरक्षा व दक्षता विभागाला मिळणार आयपीएस अधिकारी
मुंबई : एसटीच्या गेल्या अनेक वर्षांपासून रिक्त असलेल्या मुख्य सुरक्षा व दक्षता अधिकारी या महत्त्वाच्या पदावर लवकरच आयपीएस दर्जाच्या पोलिस अधिकाऱ्याची नियुक्ती होणार आहे. फेब्रुवारीमध्ये स्वारगेट येथे घडलेल्या महिला अत्याचाराच्या घटनेने संपूर्ण राज्य हादरले होते. त्या पार्श्वभूमीवर एसटीच्या सुरक्षा यंत्रणेतील ढिसाळपणा उघड झाला आणि संबंधित पद वर्षानुवर्षे रिक्त असल्याचे समोर आले. याचवेळी परिवहनमंत्री आणि एसटी महामंडळाचे अध्यक्ष प्रताप सरनाईक यांनी विधिमंडळात रिक्त पदावर आयपीएस दर्जाच्या पोलिस अधिकाऱ्याची नियुक्ती करण्याचे सांगितले होते. त्यानंतर एसटी महामंडळाच्या पाठपुराव्याला राज्याच्या गृह खात्याने हिरवा कंदील दाखवला आहे. मुख्यमंत्र्यांनी या नियुक्तीस मान्यता दिल्याने लवकरच एसटीच्या सुरक्षा व दक्षता विभागाला अनुभवी, शिस्तप्रिय व कुशल आयपीएस अधिकारी प्रमुख म्हणून मिळणार आहेत.