मुंबईतून अपहृत बालिका वाराणसीत सापडली

मुंबईतून अपहृत बालिका वाराणसीत सापडली

मुंबई, ता. १४ : सीएसएमटी येथून अपहृत झालेल्या चार वर्षांच्या बालिकेचा छडा लावण्यात मुंबई पोलिसांना यश आले. तब्बल सहा महिने आंतरराज्य शोधमोहीम राबविणाऱ्या माता रमाबाई आंबेडकर मार्ग पोलिसांना ही बालिका वाराणसी येथील एका आश्रमात सापडली; मात्र तिचे अपहरण करणारा तरुण अद्याप फरार आहे. दोन ते तीन वेळा उत्तर प्रदेशातील वाराणसी आणि आसपासचे जिल्हे पिंजल्यावर हाती अपयश पडल्यानंतरही जिद्द कायम ठेवणाऱ्या पोलिस पथकाने तेथील स्थानिक माध्यमांत मराठी बोलणाऱ्या मुलीचा शोध सुरू असल्याबद्दल जाहिरात दिली. ही जाहिरात पाहून स्थानिक पत्रकाराने वाराणसी येथील काशी अनाथ आश्रमात ही मुलगी असल्याची माहिती दिली. पोलिस पथकाने तडक वाराणसी गाठून अपहृत झालेली बालिका हीच असल्याची खात्री केली. बेवारस फिरणाऱ्या या बालिकेला एका महिलेने आश्रमात सोडले होते. पोलिसांनी बालिकेला मुंबईत आणले आणि पालकांच्या ताब्यात दिले.