आमदार-खासदारांच्या मनमानीला चाप!

आमदार-खासदारांच्या मनमानीला चाप!
झोपडपट्टी सुधारणेची कामे मंजूर ठिकाणीच; म्हाडाचा निर्णय
सकाळ वृत्तसेवा
मुंबई, ता. १६ : म्हाडाच्या झोपडपट्टी सुधार मंडळाकडून मुंबई शहरासह उपनगरांत वेगवेगळी कामे केली जातात. जिल्हा नियोजन समितीच्या निधीतून केली जाणारी कामे आमदार-खासदार सुचवत असले तरी यापुढे त्यांच्या मनमनीला चाप लागणार आहे. मंजूर केलेल्या ठिकाणीच काम केले जाणार असून, लोकप्रतिनिधींच्या मर्जीनुसार ऐनवेळी ठिकाण न बदलण्याचा निर्णय म्हाडाने घेतला आहे. तसेच संबंधित जागा मालकाच्या, संस्थेच्या ना-हरकत प्रमाणपत्राशिवाय कोणतीही कामे न करण्याचेही निर्देश म्हाडाने झोपडपट्टी सुधार मंडळाच्या अधिकाऱ्यांना दिले आहेत.
झोपडपट्टी परिसरात समाजमंदिर, सुरक्षा भिंत, शौचालय, लादीकरण, सुशोभीकरण अशी कामे म्हाडाच्या झोपडपट्टी सुधार मंडळाकडून केली जातात. ही कामे आमदार-खासदारांनी सुचवणे आवश्यक असून, त्याबाबतचा निधी जिल्हा नियोजन समिती उपलब्ध करते; मात्र अनेकदा लोकप्रतिनिधी सोयीनुसार ऐनवेळी मंजूर काम दुसऱ्या ठिकाणी करण्यास सांगतात. जागामालक असलेल्या संबंधित आस्थापना किंवा संस्थेचे ना-हरकत प्रमाणपत्र न घेता काम करण्यास भाग पाडले जाते. त्यातून कायदेशीर अडथळे निर्माण होतात. या पार्श्वभूमीवर म्हाडाचे उपाध्यक्ष व मुख्य कार्यकारी अधिकारी संजीव जयस्वाल यांच्या मंजुरीने सर्वसमावेशक कार्यपद्धती जारी करण्यात आली आहे. त्यानुसार मंजूर केलेल्या ठिकाणीच व ना-हरकत प्रमाणपत्र घेऊनच काम करण्याचे निर्देश दिले आहेत.
---
...तर नव्याने मंजुरी!
एखाद्या मंजूर झालेल्या ठिकाणी आमदार-खासदारांना काम नको असेल, तर ते रद्द करून ज्या ठिकणी काम करावयाचे आहे त्यासाठी नव्याने मंजुरी घ्यावी, असेही म्हाडाने स्पष्ट केले.
---
गैरप्रकारांना आळा
झोपडपट्टीत म्हाडाच्या झोपडपट्टी सुधार मंडळाने केलेल्या कामाचे अनेकदा वेगवेगळ्या संस्था श्रेय घेतात. त्यासाठी स्थानिक नागरिकांकडून निधी जमा केला जातो; मात्र आता म्हाडाने जारी केलेल्या सर्वसमावेशक कार्यपद्धतीमुळे गैरप्रकारांना आळा बसेल, असा विश्वास व्यक्त केला जात आहे.