दिल्ली बॉम्ब स्फोटानंतर ३५० संशयित वाहनांच्या मालकांचा शोध सुरू

दिल्ली बॉम्बस्फोटानंतर ३५० संशयित वाहनांच्या मालकांचा शोध सुरू

मुंबई, ता. १७ : दिल्ली येथील कार बॉम्बस्फोटानंतर पोलिसांनी शहरात ठिकठिकाणी अनेक दिवसांपासून बेवारस स्थितीत उभ्या ३५० हून अधिक संशयित वाहनांच्या मालकांचा शोध सुरू केला आहे.
दिल्ली स्फोटानंतर पोलिस आयुक्त देवेन भारती यांनी रेल्वेस्थानके, मेट्रो स्थानके, महत्त्वाच्या व संवेदनशील आस्थापना, बाजारपेठा, प्रार्थनास्थळे आदी ठिकाणे झीरो पार्किंग करण्याचे आदेश दिले होते. त्यानुसार कारवाई करताना ठिकठिकाणी अनेक दिवसांपासून बेवारस स्थितीत उभी असलेली ३५०हून अधिक वाहने आढळली. पोलिसांनी नोंदणी क्रमांकावरून वाहनमालकांचा पत्ता, संपर्क क्रमांक मिळवण्याचा प्रयत्न सुरू केला आहे. संपर्क झाल्यास संबंधितांना ही वाहने तातडीने स्वतःच्या घराखाली, शासकीय वाहनतळावर नेण्याच्या सूचना केल्या जात आहेत. ठरावीक दिवसात वाहने तेथून हलली नाहीत, तर ती ताब्यात घेऊन पालिकेच्या मदतीने भंगारात काढली जाणार आहेत. ज्या वाहनांच्या मालकांशी संपर्क होणार नाही, त्या वाहनांवरही हीच कारवाई केली जाईल, अशी माहिती वरिष्ठ अधिकाऱ्याने दिली.