देखभाल-दुरुस्तीसाठी विमानतळ सहा तास बंद

देखभाल-दुरुस्तीसाठी
विमानतळ सहा तास बंद
मुंबई, ता. १९ : पावसाळ्यानंतरच्या देखभाल-दुरुस्तीसाठी छत्रपती शिवाजी महाराज आंतरराष्ट्रीय विमानतळावरील विमानसेवा गुरुवारी सहा तास बंद राहणार आहे. विमानतळ प्रशासनाने सहा महिन्यांपूर्वीच विमान कंपन्यांना पूर्वसूचना दिल्याने त्यानुसार वेळापत्रकाचे नियोजन केल्याने विमानसेवेवर कोणताही परिणाम होणार नसल्याचे सांगण्यात आले.
छत्रपती शिवाजी महाराज आंतरराष्ट्रीय विमानतळावरील धावपट्ट्या गुरुवारी सकाळी ११ ते सायंकाळी ५ यादरम्यान बंद ठेवण्यात येणार आहेत. या वेळी धावपट्टीसह लगतच्या दिव्यांची दुरुस्ती, एरोनॉटिकल दिव्यांमधील बदल, संरेखन, ड्रेनेज सिस्टीममध्ये दुरुस्ती करण्यात येणार आहे. या कामाबाबत प्रशासनाने सहा महिन्यांपूर्वीच विमान कंपन्या आणि विमान वाहतूक प्राधिकरणांना सूचित केल्याने वेळापत्रकाचे नियोजन करण्यात आले आहे. त्यामुळे कोणत्याही विमान उड्डाणावर आणि आगमनावर परिणाम होणार नाही. तसेत प्रवाशांची गैरसोय होणार नसल्याचे विमानतळ प्रशासनाने सांगितले.