चारकोपमध्ये इस्टेट एजंटवर गोळीबार

चारकोपमध्ये इस्टेट एजंटवर गोळीबार

मुंबई, ता. १९ : चारकोप येथे एकाने बुधवारी (ता. १९) भरदिवसा एका व्यक्तीवर गोळीबार केला. फ्रेडी डीलीमा असे या व्यक्तीचे नाव असून तो मालमत्ता खरेदी-विक्री करणारा दलाल आहे. गोळीबारात तो गंभीर जखमी झाला असून, त्याच्यावर खासगी रुग्णालयात उपचार सुरू आहेत. पोलिस उपआयुक्त संदीप जाधव यांनी दिलेल्या माहितीनुसार दुपारी २च्या सुमारास तीन हल्लेखोर दुचाकीवरून आले. त्यातील एकाने जवळून फ्रेडी यांच्यावर गोळ्या झाडल्या. उपचारानंतर त्यांना किती गोळ्या लागल्या हे स्पष्ट होईल. याप्रकरणी चारकोप पोलिस ठाण्यात गुन्हा नोंदवण्यात आला असून, हल्लेखोरांना शोधण्यासाठी प्रयत्न सुरू आहेत. पोलिसांनी केलेल्या प्राथमिक चौकशीत हल्लेखोरांनी हेल्मेट घातले होते आणि मुखपट्ट्या लावल्या होत्या, अशी माहिती प्रत्यक्षदर्शींनी दिली आहे. चारकोप पोलिसांनी घटनास्थळावरील सीसीटीव्ही चित्रण तपासण्यास सुरुवात केल्याचे समजते. आरोपी हाती लागल्यावर फ्रेडी यांच्यावरील हल्ल्यामागील हेतू स्पष्ट होऊ शकेल, असे पोलिसांनी सांगितले.