इस्टेट एजंटवर गाेळीबार करणारे पाच अटकेत

इस्टेट एजंटवर गाेळीबार
करणारे पाच अटकेत

मुंबई, पुण्यातून आराेपींची धरपकड

मुंबई, ता. २१ ः चारकोप परिसरातील इस्टेट एजंट फ्रेडी डीलिमा यांच्यावरील गोळीबार प्रकरणात पोलिस आणि गुन्हे शाखेने एकूण पाच आरोपींना मुंबई, पुण्यातून अटक केली. यातील एका आरोपीने आर्थिक वाद आणि वैमनस्यातून फ्रेडी यांच्या हत्येची सुपारी अन्य चौघांना दिल्याची माहिती पोलिसांनी दिली.

मुन्ना मय्युद्दीन शेख ऊर्फ गुड्डू (वय ३५), राजेश चौहान ऊर्फ दया, सुभाष मोहिते, मंगेश चौधरी, रोशन सिंग ऊर्फ कृष्णा अशी अटक आरोपींची नावे आहेत. यातील चौधरी हा पुण्याच्या भोर तालुक्याचा रहिवासी असून अन्य आरोपी मुंबई, महानगर प्रदेशात वास्तव्यास आहेत. फ्रेडी यांचे अनेकांशी व्यावसायिक, वैयक्तिक वाद होते. त्यातील काहींकडे केलेल्या चौकशीत मुन्ना याचे नाव समोर आले. मुन्नाकडील चौकशीत या गुन्ह्याची उकल झाली आणि हल्लेखोरांची माहितीही समोर आली.

बुधवारी (ता. १९) दुपारी फ्रेडी यांच्यावर एका तरुणाने जवळून गोळीबार केला. त्यातील दोन गोळ्या त्यांना लागल्या आणि ते गंभीर जखमी झाले. हल्ल्यानंतर आरोपी तरुण अन्य दोन साथीदारांसोबत दुचाकीवरून पसार झाला. ही संपूर्ण घटना, त्याआधीच्या घडामोडी तेथील सीसीटीव्हीत कैद झाल्या. चित्रणावरून हल्लेखोर फ्रेडी यांच्या मागावर होते. एका इमारतीत गेलेले फ्रेडी बाहेर येण्याची वाट पाहत होते, हे स्पष्ट झाल्याचे पोलिसांनी सांगितले.