मध्य मार्गावर रविवारी मेगा ब्लॉक

मध्य रेल्वे मार्गावर
रविवारी मेगाब्लॉक

सकाळ वृत्तसेवा 
मुंबई, ता. २१ ः  विविध अभियांत्रिकी व देखभाल कामे करण्यासाठी मध्य रेल्वेमार्गावर रविवारी (ता. २३) मेगाब्लॉक घेण्यात येणार आहे. मेगाब्लाॅकदरम्यान गाड्या १० मिनिटे विलंबाने धावणार आहेत. या दिवशी हार्बर आणि ट्रान्स-हार्बर मार्गावर मेगाब्लॉक राहणार नाही. केवळ बेलापूर आणि पनवेलदरम्यान विशेष ट्रॅफिक ब्लॉक असेल.   

मध्य रेल्वे 
कुठे :  ठाणे आणि कल्याण स्थानकांदरम्यान अप आणि डाऊन जलद मार्गावर
कधी : १०.४० ते १५.४० वाजेपर्यंत
परिणाम :
-  छत्रपती शिवाजी महाराज टर्मिनस,  मुंबई येथून ९.३४ ते १५.०३ वाजेदरम्यान सुटणाऱ्या जलद/अर्ध जलद लोकल सेवा ठाणे आणि कल्याण स्थानकांदरम्यान धीम्या मार्गावर वळवल्या जातील. या गाड्या नियोजित थांब्यांसह कळवा,  मुंब्रा आणि दिवा स्थानकांवरही थांबतील.
- कल्याण येथून १०.२८ ते १५.४०दरम्यान सुटणाऱ्या अप जलद/अर्ध जलद लोकल सेवा कल्याण आणि ठाणे स्थानकांदरम्यान अप धीम्या मार्गावर वळवल्या जाणार आहेत. मुलुंड स्थानकावर या गाड्या पुन्हा अप जलद मार्गावर वळवल्या जाणार आहेत. या कालावधीत मेल/एक्स्प्रेस गाड्या ठाणे आणि कल्याण स्थानकांदरम्यान पाचव्या मार्गावरून वळवल्या जातील, तर येणाऱ्या मेल/एक्स्प्रेस गाड्या कल्याण ते ठाणे/विक्रोळीदरम्यान सहाव्या मार्गावरून वळवल्या जातील.