पदपथावरील वाहनांचे धडकेत नुकसान

जुईनगर : वाशी सेक्टर ९ येथील पोलिस चौकीलगत दोन वाहनांना जोरदार धडक देण्यात आली. या अपघातात शेजारी असलेल्या आणखी एका वाहनाचे देखील नुकसान झाले आहे. वाशीकडून कोपरखैरणेच्या दिशेने गेलेल्या वाहनानी ही धडक दिल्याची माहिती समोर येत आहे.

वाशी सेक्टर ९ येथील पादचारी पुलानजीक असलेल्या एफ टाईप प्रकारच्या मुथूट फिनकॉर्प कंपनीचे कार्यालय समोरील रस्त्यावर हा प्रकार घडला. इमारतीतील प्रशांत खंडागळे तसेच हार विक्रेते सुधीर लोणारी यांच्या वाहनांचे अपघातात नुकसान झाले आहे. पादचाऱ्यांनी दिलेल्या माहितीनुसार कोपरखैरणेच्या दिशेने गेलेल्या पांढऱ्या रंगाच्या गाडीने ही धडक दिली होती.