राज्य सांस्कृतिक पुरस्कार प्रदान

राज्य सांस्कृतिक पुरस्कार प्रदान

संजीव भागवत यांच्यासह ९८ पुरस्कार विजेत्यांचा सन्मान

सकाळ वृत्तसेवा
मुंबई, ता. ४ : २०२४-२५ या वर्षात कलेच्या विविध क्षेत्रात उल्लेखनीय कामगिरी करणाऱ्या ९८ पुरस्कार विजेत्यांचा बुधवारी राज्य सांस्कृतिक पुरस्काराने सन्मानित करण्यात आले. सांस्कृतिक कार्यमंंत्री आशीष शेलार यांच्या हस्ते या कलावंतांचा गौरव करण्यात आला. यामध्ये ‘सकाळ’चे पत्रकार संजीव भागवत, अभिनेत्री तेजश्री प्रधान, मधुरा वेलणकर, अभिनेते अरुण कदम, ज्येष्ठ पत्रकार अंबरीश मिश्र यांचा प्रामुख्याने समावेश होता. प्रभादेवी येथील रवींद्र नाट्यमंदिराच्या खुल्या सभागृहात हा सन्मासोहळा पार पडला.

या वेळी मंत्री आशीष शेलार म्हणाले, ‘कलावंताच्या पुरस्काराची रक्कम वाढवली असून १२ सांस्कृतिक क्षेत्रांऐवजी २४ क्षेत्रांचा या पुरस्कारांत समावेश केला आहे. ज्येष्ठांसोबत युवा कलाकारांना सामावून घेण्यासाठी पुरस्काराची संख्या ४८ वर नेली आहे. नवीन कलावंतांना सहभागी करून घेतल्याचे समाधान आहे. या वेळी सांस्कृतिक कार्य विभागाचे सचिव डॉ. किरण कुलकर्णी, संचालनालयाचे संचालक विभिषण चावरे उपस्थित होते. राज्यभरातून आलेल्या लोककलावंतांनी विविध लोककला सादर करून कार्यक्रमाला रंगत आणली.

‘सकाळ’चे पत्रकार संजीव भागवत यांना प्रयोगात्मक कलेच्या क्षेत्रातील पुरस्कार मिळाला आहे. तीन लाख रुपये आणि सन्मानचिन्ह असे या पुरस्काराचे स्वरूप आहे. ‘चंद्रपूरच्या महाकालीची लोकपरंपरा माय धुरपता’ या २०२४ मध्ये प्रकाशित झालेल्या संशोधनपर ग्रंथासाठी त्यांना हा पुरस्कार मिळाला आहे.

कलेच्या विविध क्षेत्र नाटक, कंठसंगीत, उपशास्त्रीय संगीत, वाद्यसंगीत, मराठी चित्रपट, कीर्तन/समाजप्रबोधन, तमाशा, शाहिरी, नृत्य, लोककला, आदिवासी गिरीजन, कलादान, प्रयोगात्मक कलेच्या क्षेत्रातील अभ्यासक, लोकनृत्य,लावणी/संगीतबारी,भारुड/विधीनाट्य, वाद्यनिर्मिती, झाडीपट्टीसह अनेक क्षेत्रांत प्रदीर्घ काळ सेवा केलेल्या कलानंताना या वेळी सन्मानित करण्यात आले.