व्यापार सहकार्याला बळ

व्यापार सहकार्याला बळ
भारत-व्हिएतनाममध्ये व्यावसायिक संबंधांवर चर्चा

सकाळ वृत्तसेवा
मुंबई, ता. १० : महाराष्ट्र चेंबर ऑफ कॉमर्स, इंडस्ट्री ॲण्ड ॲग्रिकल्चरच्या मुख्यालयास व्हिएतनामचे महावाणिज्य दूत ले क्वांग बिएन यांच्या नेतृत्वाखालील शिष्टमंडळाने भेट देऊन भारत आणि व्हिएतनाममधील दीर्घकालीन व्यावसायिक संबंध आणि गुंतवणुकीच्या संधींवर चर्चा केली.
महाराष्ट्र चेंबरचे अध्यक्ष रवींद्र माणगावे यांनी चेंबरच्या कार्याची माहिती दिली. देश व राज्यातील व्यापार, उद्योग, पर्यटन व कृषी क्षेत्राला चालना देण्यासाठी व्हिएतनामसोबत संयुक्त उपक्रम राबविण्यात येईल, असे सांगत भारत आणि व्हिएतनाममधील व्यावसायिक सहकार्य अधिक दृढ आणि दीर्घकालीन बनवण्यावर भर दिला. दोन्ही देशांमधील व्यापार, उद्योग, आर्थिक संबंधांना नवी दिशा देण्यासाठी महाराष्ट्र चेंबर प्रयत्न करेल, असेही त्यांनी सांगितले.
भारत व व्हिएतनाम दोन्ही देशांमध्ये व्यापार, उद्योग, हॉटेल आणि पर्यटन, फर्निचर उद्योग या क्षेत्रांत देवाणघेवाण आणि वाढ होण्यासाठी चेंबरच्या सहकार्याने विविध उपक्रम राबविण्यात येईल, असे व्हिएतनामचे कॉन्सुल जनरल ले क्वांग बिएन यांनी सांगितले.
महाराष्ट्र चेंबरचे उपाध्यक्ष संजय सोनवणे यांनी उत्तर महाराष्ट्र व्यापार, उद्योग, कृषी क्षेत्राची माहिती देऊन नाशिकमध्ये भेट देण्यासाठी शिष्टमंडळाला आमंत्रण दिले. कृषी समिती अध्यक्ष राजाराम सांगळे यांनी राज्यातील व उत्तर महाराष्ट्रातील कृषी क्षेत्र व कृषी प्रक्रिया उद्योगांची माहिती दिली.

महाराष्ट्र चेंबरच्या विश्वस्त मंडळाचे अध्यक्ष - ट्रस्ट बोर्ड आशीष पेडणेकर, उपाध्यक्ष करुणाकर शेट्टी, महिला उद्योजक समितीच्या अध्यक्षा डॉ. धनश्री हरदास, तसेच आंतरराष्ट्रीय व्यापार संबंध उपक्रमांचे नेतृत्व करणारे गगन महोत्रा आणि इतर सदस्य यावेळी उपस्थित होते.

या मुद्द्यांवर संवाद

आदरातिथ्य, हॉटेल आणि पर्यटन क्षेत्रातील भागीदारी करणे, निवासी विकास, रिअल इस्टेट आणि गृहनिर्माण प्रकल्पांमध्ये गुंतवणूक, शेती, कृषी उत्पादनांची निर्यात आणि तंत्रज्ञान हस्तांतरण, फर्निचर निर्यात, फर्निचर उद्योगातील व्यापार वाढवणे, गुंतवणूक संधी, दोन्ही देशांमधील व्यावसायिक गुंतवणुकीला चालना देणे, या प्रमुख मुद्द्यांवर बैठकीत सकारात्मक चर्चा झाली.