चतुर्थ श्रेणी पदांसाठी आयबीपीएसची परीक्षा

चतुर्थ श्रेणी पदांसाठी
आयबीपीएसची परीक्षा

राज्य सहकारी बँकेचे पारदर्शक धोरण

मुंबई, ता. १० : शिपाई, वाहनचालक आदी चतुर्थ श्रेणी पदांच्या भरतीसाठीदेखील राज्य सहकारी बँकेने यावर्षी ‘इन्स्टिट्यूट ऑफ बँकिंग पर्सनल सिलेक्शन’मार्फत (आयबीपीएस) नियुक्ती प्रक्रिया राबवून इतर सहकारी बँकांसमोर आदर्श ठेवला आहे. बँकेतील सहा वाहनचालक आणि ५८ शिपाई पदांसाठी अनुक्रमे ३९७ आणि १,०८२ अर्ज आले होते. सप्टेंबरमध्ये त्यांची ऑनलाइन परीक्षा घेऊन आज मुलाखतदेखील झाली, असे बँकेचे प्रशासक विद्याधर अनास्कर यांनी सांगितले.
स्वायत्त संस्थेमार्फत राबवलेल्या निवड प्रक्रियेचे कर्मचारी संघटनांनीही स्वागत केले आहे. सहकारी बँकांमध्ये शिस्त आणायची असेल, तर सर्व सहकारी बँकांनी सेवक भरतीसाठी असेच धोरण राबवणे आवश्यक आहे. त्यामुळे गुणवत्तेवर निवड झालेल्या सेवकांमध्ये आत्मविश्वास वाढीला लागेल आणि जनमानसातील बँकेची प्रतिमा सुधारेल, अशी प्रतिक्रिया कामगार संघटना व्यक्त करीत आहेत.