शिक्षण विभागाकडून अकरावी प्रवेशाची विशेष फेरी

शिक्षण विभागाकडून अकरावी प्रवेशाची विशेष फेरी
मुंबई, ता. १० ः राज्यातील कनिष्ठ महाविद्यालयांमध्ये अकरावी ऑनलाइन प्रवेशाची सर्व प्रक्रिया महिन्याभरापूर्वी संपल्यानंतर शालेय शिक्षण विभागातील अधिकाऱ्यांनी मुंबईसह राज्यातील महत्त्वाच्या शहरांमधील संस्थाचालकांचे हित साधण्यासाठी कोणतीही माहिती जाहीर न करता गुपचूप एका विशेष फेरीचे आयोजन केले आहे. या फेरीसंदर्भात अत्यंत सावधपणे ही माहिती बाहेर जाणार नाही, याची खबरदारी घेत विभागाकडून त्या फेरीचे नियोजन करण्यात आल्याची चर्चा सुरू आहे. बुधवार (ता. १०)पासून यासाठीची प्रवेश प्रक्रिया सुरू झाली आणि त्यानंतर या प्रवेश प्रक्रियेची माहिती समोर आल्याने सर्वत्र आश्चर्य व्यक्त केले जात आहे. या विशेष फेरीच्या वेळापत्रकानुसार विद्यार्थी ११ ते १२ डिसेंबरदरम्यान प्राधान्यक्रम भरतील तर निवड यादी १३ डिसेंबरला जाहीर होईल, तर १५ आणि १६ डिसेंबरला महाविद्यालयांमध्ये प्रवेश निश्चित करावे लागतील. या प्रक्रियेच्या हेतूबाबत काही शिक्षक संघटनांनी प्रश्न उपस्थित केले आहेत.