सुमित्रा महाजन ''ब्रह्मभूषण'' पुरस्काराने सन्मानित

सुमित्रा महाजन ‘ब्रह्मभूषण’ पुरस्काराने सन्मानित

सकाळ वृत्तसेवा

​मुंबई, ता. ११ : दादरस्थित ब्राह्मण सेवा मंडळाच्या १०९व्या वर्धापनदिनानिमित्त माजी लोकसभा अध्यक्षा व पद्मभूषण सुमित्रा महाजन यांना वर्ष २०२५चा ‘ब्रह्मभूषण’ पुरस्कार प्रदान करण्यात आला. ​माजी खासदार व भारतीय सांस्कृतिक संबंध परिषदेचे अध्यक्ष डॉ. विनय सहस्त्रबुद्धे यांच्या प्रमुख उपस्थितीत, मंडळाचे उपाध्यक्ष अनिरुद्ध गोडसे यांच्या हस्ते महाजन यांना हा पुरस्कार प्रदान करण्यात आला.
विविध क्षेत्रांत लक्षणीय कामगिरी केलेल्या व्यक्तीस दरवर्षी ‘ब्रह्मभूषण’ पुरस्काराने सन्मानित केले जाते. यापूर्वी शिवशाहीर बाबासाहेब पुरंदरे, डॉ. आर. डी. लेले आणि डॉ. जयंत नारळीकर यांच्यासारख्या मान्यवरांना या पुरस्काराने सन्मानित करण्यात आले आहे.

​सुमित्रा महाजन यांची नगरसेविका ते लोकसभा अध्यक्षा अशी राजकीय वाटचाल प्रेरणादायी ठरली आहे. सलग आठ वेळा एकाच मतदारसंघाचे प्रतिनिधित्व करणाऱ्या व सर्वाधिक काळ लोकसभा सदस्य असणाऱ्या त्या एकमेव महिला खासदार आहेत. प्रमुख अतिथी डॉ. सहस्त्रबुद्धे यांनी आपल्या भाषणात, त्यांच्या सामाजिक व राजकीय कार्याचा आढावा घेतला, तसेच त्यांच्या जिज्ञासू स्वभावाचा उल्लेख केला.
​पुरस्काराला उत्तर देताना सुमित्रा महाजन यांनी नमूद केले की, आई-वडिलांच्या आणि अनेक मान्यवरांच्या सहवासात झालेल्या संस्कारांचे फलित म्हणजेच आजचा हा सन्मान आहे. अनेक प्रतिष्ठित मान्यवरांच्या उपस्थितीत या कार्यक्रमाची सांगता ‘वंदे मातरम’ने झाली.
....