विद्यापीठाच्या लाचखाेर वरिष्ठ लिपिकास अटक

विद्यापीठाच्या लाचखाेर
वरिष्ठ लिपिकास अटक

गुणपत्रिकेसाठी मागितली ५५ हजार रुपयांची लाच

मुंबई, ता. ११ : मुंबई विद्यापीठात वरिष्ठ लिपिकपदी नियुक्त निकिता राठोड (३६) यांना एका विद्यार्थ्याकडून १० हजार रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहाथ अटक केली.
एसीबीने दिलेल्या माहितीनुसार जुलैमध्ये राठोड यांनी तक्रारदार तरुणाला अंतिम वर्षाच्या गुणपत्रिकेसाठी ५५ हजार रुपयांची लाच मागितली होती. त्यातील १५ हजार रुपये राठोड यांनी घेतले; मात्र उर्वरित ४० हजार दिल्यावरच गुणपत्रिका मिळेल, असे स्पष्ट केले. विद्यार्थ्याने याबाबत एसीबीकडे तक्रार दिली. १० डिसेंबरला राठोड यांनी ४० हजारांऐवजी १० हजार रुपयांवर तडजोड केली. ती रक्कम घेताना एसीबी पथकाने त्यांना रंगेहाथ पकडले. या कारवाईनंतर एसीबीने प्रक्रियेनुसार राठोड यांच्या निवासस्थान आणि कार्यालयात शोधाशोध करण्यात आल्याचे समजते.