इंडिगो १० हजारांचे प्रवास कुपन देणार

इंडिगो १० हजारांचे प्रवास कूपन देणार
विमान रद्द झालेल्या प्रवाशांना दिलासा

सकाळ वृत्तसेवा
मुंबई, ता. ११ ः इंडिगो या प्रवासी विमान वाहतूक कंपनीच्या भोंगळ कारभारामुळे काही दिवसांपासून हजारो प्रवाशांना मोठ्या अडचणींचा सामना करावा लागला होता. आता विमानउड्डाण रद्द झालेल्या त्या प्रवाशांना इंडिगो कंपनी १० हजार रुपयांचे प्रवासाचे कूपन देणार आहे. हे कूपनचा वापर वर्षभराच्या आत इंडिगोचे तिकीट आरक्षित करण्यासाठी करता येईल, असे कंपनीने पत्रक काढून स्पष्ट केले आहे.
३ ते ५ डिसेंबरच्या दरम्यान उड्डाण रद्द झालेल्या, विमानतळावर अडकून पडलेल्या प्रवाशांना ही कूपन दिली जातील, याशिवाय उड्डाणाला २४ तासांपेक्षा कमी वेळ शिल्लक असताना उड्डाण रद्द झालेल्या विमान प्रवाशांना पाच ते १० हजार रुपयांची नुकसानभरपाई दिली जाणार आहे.
इंडिगोने आपल्या निवेदनात म्हटले आहे, की ग्राहकांची काळजी घेणे हे आमचे प्राधान्य आहे; मात्र काही दिवसांपूर्वी काही अडचणींनंतर रद्द झालेल्या विमानांसाठी आता प्रवाशांना सर्व परतावे देण्यात येत आहेत. आम्हालाही हे मान्य करावे लागेल, की ३, ४ आणि ५ डिसेंबर २०२५ रोजी आमचे काही ग्राहक अनेक विमानतळांवर अडकून पडले होते. त्यांना त्रासाला सामोरे जावे लागले. त्यामुळे आमच्या अडचणींमुळे त्रस्त झालेल्या प्रवाशांसाठी आम्ही १० हजार रुपयांचे ट्रॅव्हल कूपन देणार आहोत. प्रवाशांना हे ट्रॅव्हल कूपन पुढील एका वर्षांसाठी कोणत्याही भविष्यातील इंडिगोच्या प्रवासासाठी वापरता येणार आहे, अशी माहिती ‘इंडिगो’ने निवेदनात दिली आहे.