घनकचरा व्यवस्थापनासाठी उच्चस्तरीय समिती स्थापन

घनकचरा व्यवस्थापनासाठी
उच्चस्तरीय समिती स्थापन

सकाळ वृत्तसेवा
​मुंबई, ता. ११ : मुंबई उच्च न्यायालयाने जनहित याचिकेच्या सुनावणीदरम्यान दिलेल्या आदेशानंतर कांजूरमार्ग येथील महापालिकेच्या कचरा डेपो आणि घनकचरा व्यवस्थापनाच्या प्रश्नावर तोडगा काढण्यासाठी महाराष्ट्र शासनाने महाराष्ट्र राज्याच्या मुख्य सचिवांच्या अध्यक्षतेखाली उच्चस्तरीय समिती स्थापन केली आहे. ​नगरविकास विभागाने यासंबंधीचा शासन निर्णय ८ डिसेंबरला जारी केला आहे.

​‘वनशक्ती आणि इतर’ संस्था यांनी दाखल केलेल्या जनहित याचिकेत मुंबईतील कचरा व्यवस्थापनाबाबत तक्रारी उपस्थित केल्या होत्या. याशिवाय याच विषयाशी संबंधित अन्य पुनर्विचार याचिका आणि रिट याचिकाही उच्च न्यायालयाने सदर जनहित याचिकेसोबत संलग्न केल्या आहेत. ​याचिकेवर सुनावणी करताना उच्च न्यायालयाने मुख्य सचिवांच्या अध्यक्षतेखाली समिती स्थापन करण्याचे निर्देश दिले होते. त्यानुसार हा महत्त्वाचा शासन निर्णय घेण्यात आला आहे.
​
उपमुख्यमंत्री (नगर विकास) यांच्या मार्गदर्शनाखाली व नियंत्रणाखाली ही समिती काम करणार आहे. स्थापन करण्यात आलेल्या उच्चस्तरीय समितीची रचना आणि कामेदेखील शासनाने निर्धारित केली आहेत. ​ही उच्चस्तरीय समिती उच्च न्यायालयाच्या निर्देशांनुसार, मुंबई महापालिकेच्या आयुक्तांनी सादर केलेल्या ‘ठोस उपयायोजनांचा आराखडा’ सखोलपणे अभ्यासून तो उच्च न्यायालयाला सादर करण्याची कार्यवाही करणार आहे.
..........
समितीतील सदस्य
मुंबई महापालिका आयुक्त, नगरविकास विभागाचे (नवि-२) अपर मुख्य सचिव, सदस्य सचिव नगरविकासचे सहसचिव (नवि-२१), अध्यक्षांच्या निर्देशांनुसार निमंत्रित सदस्य.
.........