म्हाडाची घरांच्या नावाने फसवणारा गजाआड

म्हाडा घरांच्या नावाने
फसवणारा गजाआड

आर्थिक गुन्हे शाखेची कारवाई

मुंबई, ता. ११ : शासकीय कोट्यातून स्वस्त दरात म्हाडाची घरे मिळवून देण्याचे प्रलोभन दाखवून मुंबई महानगर प्रदेशातील अनेकांची कोट्यवधी रुपयांना फसवणूक करणाऱ्या जितेंद्र राठोड (वय ५३) याला आर्थिक गुन्हे शाखेने चेंबूर येथील उपाहारगृहातून अटक केली. त्याच्याविराेधात फसवणुकीचे आठ गुन्हे दाखल असून फसवणुकीची रक्कम कोट्यवधींच्या घरात आहे. तक्रारीसाठी फसवणूक झालेल्या नागरिकांनी पुढे यावे, असे आवाहन आर्थिक गुन्हे शाखेने केले आहे.

सारा फर्नांडीस (५०) यांच्या तक्रारीनुसार, राठोड आणि त्याच्या साथीदारांना २०१२ ते २०१९दरम्यान शासकीय कोट्यातून कमी दरात म्हाडाची सदनिका देण्याचे प्रलोभन दाखवून ७० लाख उकळले होते. या गुन्ह्यातील अन्य आरोपींना अटक झाली असून राठोड पसार होता. त्याच्याविरोधात शहरातील विविध पोलिस ठाण्यांमध्ये आठ गुन्हे नोंद असल्याने आर्थिक गुन्हे शाखेने हे प्रकरण आपल्याकडे घेतले. राठोडला अटक करण्यासाठी विशेष पथक स्थापन करण्यात आले होते. सहाय्यक पोलिस निरीक्षक नितीन पवार, अंमलदार मंदार राणे, जयेश अत्तरदे यांनी तांत्रिक तपासावरून गुरुवारी राठोडला अटक केली.