ठग वैभव ठाकर फसवणूक प्रकरण

ठग वैभव ठाकर फसवणूक प्रकरण
सत्र न्यायालयाकडून आज निकालाची शक्यता

सकाळ फॉलोअप
मुंबई, ता. ११ : ठग वैभव ठाकरची पत्नी प्रियांका आणि सासू सुरेखा जैन यांच्या अटकपूर्व जामिनावरील निकाल गुरुवारी सत्र न्यायालयाने राखून ठेवला. शुक्रवारी न्यायालय आपला निकाल देण्याची शक्यता आहे.
मुख्यमंत्री कार्यालयातील वरिष्ठ अधिकारी असल्याचे भासवून सराफा व्यावसायिक शैलेश जैन यांना २.८० कोटींना फसविल्याप्रकरणी एल. टी. मार्ग पोलिसांनी गेल्या आठवड्यात वैभव आणि त्याचा साथीदार बिरजू सल्ला यांना अटक केली. वैभवच्या अटकेनंतर गुन्ह्यात आरोपी असलेल्या प्रियांका आणि सुरेखा यांनी अटकपूर्व जामिनासाठी अर्ज केला.
कस्टम विभागाने जप्त केलेले सोने स्वस्तात मिळवून देतो, असे प्रलोभन दाखवत वैभव आणि प्रियांकाने जैन यांना १.१५ कोटी रुपये ग्लोबल कनेक्ट कन्सल्टन्सी या कंपनीच्या खात्यावर वळते करण्यास भाग पाडले. ही आपली कंपनी असल्याचा दावा प्रियांकाने केला होता, असा आरोप आहे; मात्र ही कंपनी प्रियांका यांची नसून त्या या खात्याशी निव्वळ वारसदार म्हणून संबंधित होत्या, असा दावा बचावपक्षाच्या वकिलाने केला.
मात्र वारसदार असो वा प्रत्यक्ष खातेदार रक्कम संबंधित खात्यावर वळती झाल्याचे स्पष्ट पुरावे आहेत. त्या रकमेचा विनियोग आरोपींनीच केला आहे, असा युक्तिवाद जैन यांचे वकील ॲड. राहुल गायकवाड यांनी केला. तसेच सुरेखा यांनी सुमारे दीड कोटींचे दागिने ऑनलाइन विक्रीसाठी जैन यांच्याकडून घेतले होते. इन्स्टाग्राम खात्यावर त्यांनी ही दागिने परिधान करत जाहिरात केल्याचे पुरावेही ॲड. गायकवाड यांनी न्यायालयाला दाखवले.