गं. द. आंबेकर यांचे संस्कार एनटीसी मिल प्रश्नी यश मिळवून देतील

गं. द. आंबेकर यांचे संस्कार एनटीसी मिलप्रश्नी यश मिळवून देतील
स्मृतिदिनी गोविंदराव मोहिते यांनी व्यक्त केला विश्वास
सकाळ वृत्तसेवा
मुंबई, ता. १५ : केंद्र सरकारने कोविडचे कारण पुढे करून बंद ठेवलेल्या मुंबईसह देशातील २३ एनटीसीच्या गिरण्या अद्याप सुरू केलेल्या नाहीत. गेली पाच वर्षे संघटनेने आंदोलने छेडतानाच न्यायालयीन मार्ग चोखाळले असून, आता एनसीएलटीसारख्या न्यायाधीकरणाचा दरवाजा ठोठावला आहे. त्यामुळे आम्हाला खात्री आहे, गं. द. आंबेकरजी यांचे संस्कार आणि संघटनेचे अध्यक्ष सचिन अहिर यांचे खंबीर नेतृत्व याकामी यश मिळवून देईल, असा विश्वास राष्ट्रीय मिल मजदूर संघाचे सरचिटणीस गोविंदराव मोहिते यांनी गं. द. आंबेकर स्मृतिदिन कार्यक्रमात बोलताना व्यक्त केला.
राष्ट्रीय मिल मंजूर संघ आणि महाराष्ट्र राज्य राष्ट्रीय कामगार संघाच्या संयुक्त विद्यमाने शनिवारी (ता. १३) महात्मा गांधी सभागृहात संघटनेचे आद्य संस्थापक कामगार महर्षी गं. द. आंबेकर यांचा पुण्यतिथीदिन संपन्न झाला. त्या वेळी सरचिटणीस गोविंदराव मोहिते बोलत होते. या औचित्याने आंबेकर स्मृतिप्रीत्यर्थ विविध स्पर्धा आणि सामाजिक उपक्रमांचा सप्ताह आयोजित करण्यात आला होता. त्याचा समारोप आणि स्पर्धा विजेत्यांना बक्षीस वितरणही स्मृतिदिनी पार पडले. समारंभाला मुंबई मराठी पत्रकार संघाचे अध्यक्ष संदीप चव्हाण, महाराष्ट्र इंटकचे अध्यक्ष डॉ. कैलास कदम, कामगार सहाय्यक आयुक्त किशोर निमजे, महाराष्ट्र इंटकचे कोषाध्यक्ष दिवाकर दळवी, क्रीडाप्रमुख आणि उपाध्यक्ष सुनील बोरकर, सुनील अहिर, जी .बी. गावडे, राजन लाड, उत्तम गिते, मिलिंद तांबडे, शिवाजी काळे, किशोर रहाटे, साई निकम, संजीत खान, वैशाली हेगडम उपस्थित होते.