आधी पैसे मगच एमएमआरडीएला घरांचा ताबा

आधी पैसे मगच एमएमआरडीएला घरांचा ताबा
एल्फिन्स्टन बधितांसाठीच्या घराबाबत म्हाडाची भूमिका; ९७ कोटींची एकरकमी किंमत हवी
सकाळ वृत्तसेवा
मुंबई, ता. १५ : वरळी-शिवडी कनेक्टरसाठी एमएमआरडीएकडून एल्फिन्स्टन येथे उभारण्यात येणाऱ्या डबल डेकर पुलामुळे येथील दोन इमारतींमधील ८३ घरे बाधित होणार आहेत. त्या पार्श्वभूमीवर एमएमआरडीए म्हाडाच्या माध्यमातून संबंधित रहिवाशांना दादर, प्रभादेवी, वडाळा, अँटाॅप हिल परिसरातील घरे दिली जाणार आहेत. त्यानुसार म्हाडाने त्याची दुरुस्तीही केली आहे, मात्र सर्व घरांच्या किमतीपोटी एमएमआरडीएने सुमारे ९७ कोटी रुपये द्यावेत, त्यानंतरच घरांचा ताबा दिला जाईल, अशी भूमिका म्हाडाने घेतली आहे. त्यामुळे एमएमआरडीए काय करणार, याकडे रहिवाशांसह म्हाडाचे लक्ष लागले आहे.
एल्फिन्स्टन येथे उभारल्या जाणाऱ्या पुलाच्या कामामुळे बाजूलाच असलेल्या हाजी नुरानी आणि लक्ष्मी निवास या दोन इमारती बाधित होणार आहेत. लक्ष्मी निवास या इमारतीत ६० तर हाजी नुरानी या इमारतीत २३ रहिवासी आहेत. संबंधित रहिवाशांनी आपल्याला आहे त्याच परिसरात घरे मिळावीत, अशी आक्रमक भूमिका घेतल्याने एमएमआरडीएने म्हाडाच्या मुंबई इमारत दुरुस्ती व पुनर्रचना मंडळाच्या मालकीची असलेली घरे देण्याचा निर्णय घेतला आहे. त्यानुसार म्हाडाने दादर, प्रभादेवी, माहीम, माटुंगा, वडाळा, अँटाॅप हिल येथील सुमारे ११९ घरे एमएमआरडीएच्या अधिकाऱ्यांना दाखवली होती. त्यापैकी ८३ घरे संयुक्त पाहणीत अंतिम केली होती.
सदरची घरे १५ दिवसांत दुरुस्त करून द्यावीत, असेही एमएमआरडीएच्या अधिकाऱ्यांनी म्हाडाला सांगितले होते. त्यानुसार म्हाडाने त्याची दुरुस्ती केली आहे. दरम्यान, घरांची रेडिरेकनर दराच्या ११० टक्क्यांनुसार संपूर्ण ९७ कोटी रुपये किंमत मिळाल्यानंतरच घरांचा ताबा दिला जाईल, अशी भूमिका म्हाडाने घेतली आहे. त्याबाबतचे पत्र लवकरच एमएमआरडीएला पाठवले जाणार असल्याची माहिती म्हाडाच्या मुंबई इमारत दुरुस्ती व पुनर्रचना मंडळाच्या एका वरिष्ठ अधिकाऱ्याने दिली.

दुरुस्तीवरील खर्चाची मागणी करणार
म्हाडाने एमएमआरडीएला ११९ घरे दाखवली होती. सदरची घरे बंद असल्याने त्यामध्ये प्लास्टर तुटने, खिडकी फुटणे, किचन, बाथरूममध्ये दुरुस्तीची कामे करावी लागली आहेत. त्यावर म्हाडाचा लाखो रुपयांचा खर्च झाला आहे. त्यामुळे तोही एमएमआरडीएकडून मिळणे अपेक्षित आहे. त्याचीही मागणी केली जाणार असल्याचे म्हाडाच्या अधिकाऱ्याने सांगितले.