प्रतीक्षा नगर संक्रमण शिबिरात गॅस पाईपलाईन योजनेचा शुभारंभ;

प्रतीक्षा नगर संक्रमण शिबिरात गॅस पाइपलाइन योजनेचा प्रारंभ
नागरिकांना मोठा दिलासा
सकाळ वृत्तसेवा
मुंबई, ता. १६ : प्रतीक्षा नगर संक्रमण शिबिरात गॅस पाइपलाइन योजनेची सुरुवात करण्यात आली. सर्व इमारतींमध्ये गॅस पाइपलाइनने गॅसपुरवठा करणे शक्य होणार असून, त्‍यामुळे नागरिकांना मोठा दिलासा मिळणार आहे.
पुनर्विकासाच्या प्रतीक्षेत असलेल्या प्रतीक्षा नगर येथील संक्रमण शिबिरांमध्ये वास्तव्यास असलेल्या कुटुंबांना सुरक्षित व नियमित गॅसपुरवठ्याअभावी अनेक अडचणींना सामोरे जावे लागत होते. घराघरात गॅस पाइपलाइन नसल्यामुळे नागरिकांना सिलिंडरवर अवलंबून राहावे लागत होते. सिलिंडर अचानक संपल्यास स्वयंपाकाची गैरसोय होत असल्याने सुरक्षित, सोयीस्कर आणि परवडणारी गॅस सुविधा ही येथील नागरिकांची अत्यावश्यक गरज बनली होती.
ही गरज ओळखून राज्याचे उपमुख्यमंत्री एकनाथ शिंदे यांच्या नेतृत्वाखाली सातत्यपूर्ण प्रयत्न सुरू होते. अखेर या पाठपुराव्याला यश मिळाले. प्रभाग क्रमांक १७३ चे शिवसेना नगरसेवक रामदास देविदास कांबळे यांच्या संयुक्त प्रयत्नांमुळे तसेच म्हाडा आणि महानगर गॅस लिमिटेड यांच्या सहकार्याने प्रतीक्षा नगर संक्रमण शिबिरात गॅस पाइपलाइन योजना सुरू करण्यात आली. या योजनेचा भूमिपूजन सोहळा मंगळवारी (ता. १५) दुपारी २.३० वाजता स्थानिक नागरिकांच्या हस्ते पार पडला.
या उपक्रमाअंतर्गत प्रतीक्षा नगर येथील संक्रमण शिबिरातील इमारत क्रमांक टी–१ ते टी–६७, जुनी इमारत क्रमांक २ ते ६ तसेच बहुमजली इमारत क्रमांक १ ते २० मधील नागरिकांना घरोघरी गॅस पाइपलाइन कनेक्शन उपलब्ध करून देण्यात येणार आहे. या सुविधेमुळे नागरिकांना सुरक्षित, नियमित व सोयीस्कर गॅसपुरवठा मिळणार असून, वेळ, खर्च आणि श्रमांची मोठी बचत होणार आहे. नागरिकांच्या दैनंदिन गरजांवर ठोस उपाय केल्याबद्दल संक्रमण शिबिरातील रहिवाशांनी समाधान व्यक्त केले आहे.
.......